Ali və orta ixtisas təhsili müəssisələrinə qabiliyyət imtahanları keçirilir.

İdman istiqaməti üzrə qabiliyyət imtahanları hazırda Bakıda Azərbaycan İdman Akademiyası və Tofiq Bəhramov adına Respublika Stadionunda təşkil olunub.

Regionlarda isə Tovuz, İsmayıllı və Şərur Olimpiya İdman Komplekslərində imtahanlar keçirilir.

Qabiliyyət imtahanları Dövlət İmtahan Mərkəzi (DİM) tərəfindən mərkəzləşdirilmiş qaydada təşkil olunub.

Qabiliyyət imtahanlarının keçirilməsi üçün bu il 100-dən artıq Qabiliyyət İmtahanı Komissiyası (QİK) fəaliyyət göstərəcək.

QİK-lərin tərkibinə müvafiq dövlət qurumları, ali və orta ixtisas təhsili müəssisələrinin mütəxəssisləri, yaradıcılıq ittifaqlarının üzvləri, digər təşkilat, komitə və birliklərin nümayəndələri, həmçinin DİM-in əməkdaşları daxil ediliblər.

Abituriyentlərin yerinə yetirdikləri tapşırıqları qiymətləndirmək üçün təşkil edilən QİK-lərin tərkibi Qabiliyyət İnformasiya Sistemi (QABİS) vasitəsilə müəyyən edilir.

2025/2026 tədris ilinə qabiliyyət imtahanlarında iştirak etmək üçün ali təhsil müəssisələrinin V ixtisas qrupuna aid ixtisaslar üzrə 29 197, tam (11 illik) orta təhsil bazasından orta ixtisas təhsil müəssisələrinə qəbul olmaq istəyən 4 600, ümumi (9 illik) orta təhsil bazasında orta ixtisas təhsili müəssisələrinə qəbul olmaq üçün isə 3 981 olmaqla, ümumilikdə 36 778 nəfər qeydiyyatdan keçib.

Qeyd edək ki, imtahanlara iyunun 20-dən start verilib və avqust ayının ortalarına qədər davam edəcək.