Əmək və Əhalinin Sosial Müdafiəsi Nazirliyinin (ƏƏSMN) Kollegiyası "Məcburi dövlət sosial sığortası məqsədilə sığortaedənlərin və sığortaolunanların uçotu Qaydası"nda dəyişiklik edib.

Azerimedia.Az xəbər verir ki, bununla bağlı kollegiya müvafiq qərar qəbul edib.

Dəyişikliyə əsasən, qaydanın 3.6-cı bəndində yer alan "14.5.1-1.9-cu" sözləri "14.5.1-1.3-cü" sözləri ilə əvəz olunub.

Qeyd olunan bəndə görə, öz-özünü sığortaedənlərin, eləcə də "Sosial sığorta haqqında" Qanunun 14.5.1-1.3-cü maddəsinə uyğun olaraq mülkiyyətində olan kənd təsərrüfatına yararlı torpaqlardan istifadə edən fiziki şəxslərin və ailə kəndli təsərrüfatlarının əmək qabiliyyətli ailə üzvlərinin sığortaolunan kimi uçotu avtomatlaşdırılmış qaydada həyata keçirilir.

Bu zaman Dövlət Vergi Xidmətinin təqdim etdiyi məlumatlar, həmçinin dövlət qurumlarının informasiya sistemlərində mövcud olan uçot məlumatları əsasında sığortaedənin ayrıca müraciəti olmadan sosial sığorta nömrəsi verilir.

Sənədə əsasən, ƏƏSMN-in Hüquq şöbəsinə qərarın üç gün müddətində Ədliyyə Nazirliyinə təqdim olunaraq Hüquqi Aktların Dövlət Reyestrinə daxil edilməsinin təmin olunması tapşırılıb.

Bundan başqa, qərar reyestrə daxil edildikdən sonra 72 saat ərzində rəsmi dərc olunmalıdır.

Qərarın icrasına nəzarət isə ƏƏSMN-in müəyyən edilmiş vəzifə bölgüsünə uyğun həyata keçiriləcək.