İsrail Müdafiə Ordusu (SAXAL) Qəzzanın şərqində quru əməliyyatına başlayıb.

Bu barədə ordunun mətbuat xidmətinin bəyanatında deyilir.

Bildirilib ki, son bir neçə saat ərzində İsrail Müdafiə Ordusunun qoşunları təhlükəsizlik zonasını genişləndirmək məqsədilə Qəzzanın şimalında Əş-Şucaiyyə rayonunda quru əməliyyatına başlayıb.

"Əməliyyat çərçivəsində qoşunlar çoxlu sayda terrorçunu, həmçinin HƏMAS-ın terror obyektlərini, o cümlədən terrorçuların hücumları planlaşdırmaq və həyata keçirmək üçün istifadə etdiyi komanda-nəzarət mərkəzini məhv edib", - deyə bəyanda qeyd edilib.

Qurum qeyd edib ki, əməliyyat zamanı və başlamazdan əvvəl İsrail Müdafiə Ordusu mülki şəxslərin təhlükəsizliyi üçün təşkil edilmiş marşrutlar vasitəsilə döyüş zonasından təxliyəsinə icazə verib.

İsrail hərbçiləri İsrail Dövlətinin vətəndaşlarını qorumaq üçün Qəzza zolağında terror təşkilatlarına qarşı fəaliyyətlərini davam etdirəcəklərini vurğulayıblar.

Martın 18-də İsrail ordusu Qəzza zolağında döyüş əməliyyatlarını bərpa edərək, anklavı kütləvi zərbələrə məruz qoyub və bununla da yanvarda müəyyən edilmiş atəşkəs rejimini pozub. Baş nazir Benyamin Netanyahunun ofisi bunu HƏMAS-ın vasitəçilər və ABŞ prezidentinin xüsusi nümayəndəsi Stiven Uitkoff tərəfindən danışıqlarda irəli sürülən təklifləri rədd etməsi ilə izah edib və əməliyyatın məqsədinin bütün girovların azad edilməsi olduğunu bildirib. Hərəkat döyüş əməliyyatlarının bərpasına görə məsuliyyəti İsrail və ABŞ-nin üzərinə atıb.