Əgər ABŞ və ya İsrail nüvə silahı bəhanəsi ilə İranı bombalasa, Tehran atom bombası istehsalına başlamağa məcbur olacaq. Bunu İranın ali rəhbərinin müşaviri Əli Laricani İran dövlət televiziyasının "Xüsusi söhbət" proqramına müsahibəsində bəyan edib. Onun bu sözləri həm ölkə daxilində, həm də beynəlxalq aləmdə geniş müzakirələrə səbəb olub, Ayətullah Əli Xameneinin nüvə silahının istehsalını və istifadəsini haram elan edən məlum fətvasını yenidən gündəmə gətirib.

Azerimedia.Az-ın məlumatına görə, bu barədə "Azad İran" "YouTube" kanalında yayımlanan növbəti videosüjetdə qeyd olunur.

Müəllifin sözlərinə görə, elə bu günlərdə Xameneinin bu mövzuya toxunması böyük maraq yaradıb. İranın ali rəhbəri tələbələrlə görüşündə belə deyib:

"İranın nüvə silahı əldə etməsinə imkan verməyəcəklərini bəyan edirlər. Əgər biz atom silahı düzəltmək istəsəydik, ABŞ bizi dayandıra bilməzdi. Biz nüvə silahı əldə etməmişiksə, bu, öz seçimimizdir. Əgər istəsəydik, onlar bizə mane ola bilməzdilər "

Videoda qeyd edilir ki, Laricaninin sözləri ABŞ və İsrailin təhdidləri fonunda İran hakimiyyətində belə bir qərar qəbul etmək istəyi yarana biləcəyini göstərir.

"Başqa sözlə, Xameneinin təxminən 20 il əvvəl verdiyi və atom bombasını haram elan edən fətva, indiki şəraitdə İran üçün dəyişə bilər. O da qeyd edilməlidir ki, Laricani bunun ciddi xarici təhlükə qarşısında xalqın tələbi ilə baş verəcəyini bildirib".

Ətraflı süjetdə: