Rusiyada miqrantların uşaqları üçün rus dili testini vermək cəhdlərinin sayı iki illə məhdudlaşdırıla bilər.

Bu barədə yaxın vaxtlarda Rusiya Dövlət Dumasına təqdim ediləcək qanun layihəsinin mətnindən aydın olur.

Sənəd Dövlət Dumasının əmək, sosial siyasət və veteranlar məsələləri üzrə komitəsinin sədri Yaroslav Nilov tərəfindən hazırlanıb.

"Rus dilini bilmək üçün test cəhdlərinin sayını ardıcıl iki illə məhdudlaşdırmaq təklif olunur, bundan sonra əcnəbi vətəndaş ibtidai ümumi, əsas ümumi və orta ümumi təhsil proqramlarını pulsuz əsasda mənimsəmək hüququnu itirir", - deyə izahat qeydində məlumat verilir.

Nilovun sözlərinə görə, hazırda belə bir testin keçirilməsi üçün ümumi cəhd sayı məhdudlaşdırılmayıb.

"Eyni zamanda qeyd etmək vacibdir ki, belə testlər əcnəbi vətəndaşlar üçün pulsuz əsasda, yəni büdcə vəsaiti hesabına, deməli, vergi ödəyiciləri hesabına həyata keçirilir", - deyə Nilov dəqiqləşdirir.

Müəllifin fikrincə, qanun layihəsi şagirdlər arasında mümkün yaş fərqini aradan qaldıracaq, çünki əcnəbi vətəndaş rus dilini öyrənərkən əsas proqramı mənimsəməyə bilər.

"Bu problem məktəb yaşlı uşaqlar üçün son dərəcə aktualdır. Təhsil rahat və təhlükəsiz mühitdə aparılmalıdır. Uşaq kollektivində bir il yaş fərqi o qədər də əhəmiyyətli deyilsə, iki il fərq həm şagirdlər, həm də müəllim heyəti üçün artıq narahatlıq yaradır. Bu həm də o deməkdir ki, iki il ərzində əcnəbi vətəndaş Rusiya cəmiyyətinə inteqrasiya olunmayıb, çünki dili bilmədən bunu etmək kifayət qədər problemlidir", - deyə izahat qeydində vurğulanıb.

Qeyd edək ki, aprelin 1-dən rus dilini bilməyən miqrant uşaqlarının məktəblərə qəbulunu qadağan edən qanun qüvvəyə minib.

Testlər ümumtəhsil müəssisələrində keçirilməli, bütün prosedur videoya çəkilməli, uşağın şifahi cavabları audioya yazılmalıdır. Testin uğursuz keçirilməsi halında uşağa əlavə dil təlimi təklif olunacaq və təkrar test ən tez üç aydan sonra keçirilə bilər.

Bundan əvvəl xəbər verilmişdi ki, miqrantların uşaqları Rusiya məktəblərinə qəbul olmaq istəyirlərsə, rus dili imtahanında sualların 90%-nə düzgün cavab verməlidirlər.