Rusiya ilə Ukrayna arasında birbaşa danışıqların növbəti raundunun İstanbulda keçirilməsinin tarixləri tərəflərin iyunun 2-də mübadilə etdikləri memorandum layihələri öyrənildikdən sonra razılaşdırılacaq.

Bu barədə Rusiya Federasiyası Prezidentinin mətbuat katibi Dmitri Peskov brifinqdə jurnalistlərin suallarını cavablandırarkən məlumat verib.

Onun sözlərinə görə, sənədlərin təhlili bir qədər vaxt aparacaq. “Tərəflər hazır olduqları məqamda növbəti raund üçün yeni tarixlər barədə razılığa gələcəklər”, -deyə Kremlin nümayəndəsi bildirib.

Danışıqların mümkün qanunauyğunluğu barədə sualı cavablandıran Peskov qeyd edib ki, sabit dövriyyənin yaradılması mümkün deyil. O, bunu belə izah edib: “Bu, tərəflərin hər raundu davam etdirməyə hazır olmasından asılıdır. Təmaslar həyata keçirilir və bu əsnada məqbul tarixlər müəyyən ediləcək”.

Bir gün əvvəl Dövlət Dumasının Beynəlxalq Əlaqələr Komitəsinin sədri Leonid Slutski bildirmişdi ki, birbaşa danışıqların növbəti, üçüncü raundu iyunun sonunda İstanbulda baş tuta bilər.

Peskov, həmçinin brifinqdə Ukrayna pilotsuz təyyarələrinin iyunun 1-də Rusiya hərbi aerodromlarına hücumları ilə bağlı vəziyyəti şərh edib. O, təhqiqat aparıldığını və məsuliyyət daşıyanların müəyyən edilməsi üçün lazım olan hər şeyin ediləcəyini vurğulayıb. Hücumlarda əli olmaqda şübhəli bilinən və medianın məlumatına görə, Qazaxıstanda gizlənən Artyom Timofeyevin mümkün ekstradisiyası ilə bağlı jurnalistlərin sualına cavabında Peskov bildirib ki, bu məsələ istintaqı aparan xüsusi xidmət orqanlarının səlahiyyətinə aiddir.