"Rusiya xərçəng əleyhinə yerli peyvəndi yaxın aylarda eksperimental rejimdə tətbiq etməyə başlayacaq".

Azerimedia.Az bildirir ki, bunu "RİA Novosti"yə Qamaleya adına Epidemiologiya və Mikrobiologiya üzrə Milli Tədqiqat Mərkəzinin direktoru Aleksandr Qintsburq deyib.

Onun sözlərinə görə, preparat melanoma xəstələri üçün hazırlanıb. Plan Səhiyyə Nazirliyi tərəfindən təsdiq edilib. O, daha əvvəl bildirmişdi ki, vaksin təkcə ilkin melanoma xəstələri üçün deyil, həm də artıq müəyyən müalicə mərhələlərindən keçmiş xəstələr üçün istifadə olunacaq.

Qintsburq deyib ki, digər ölkələr də yeni vaksinlə maraqlanır. Artıq 10 ölkə preparatla bağlı müraciət edib.

Səhiyyə Nazirliyinin baş onkoloqu Andrey Kaprinin sözlərinə görə, bir xəstə üçün xərçəngə qarşı mRNT vaksinin yaradılması təxminən 300 min rubla (təqribən 6 400 manat - red.) başa gələcək. Xəstələr onu pulsuz əldə etməli, bütün xərcləri isə dövlət ödəməlidir.