Çin ordusu Pekində keçiriləcək hərbi paradda ölkənin ən müasir hipersəs raketlərini, yeni tankları və pilotsuz sistemlərini nümayiş etdirəcək.

Parad Çin xalqının yapon işğalçılarına qarşı mübarizədə qələbəsinin 80 illiyi və Ümumdünya Antifaşist Müharibəsi şərəfinə keçiriləcək.

Hərbi paradın keçirilməsi üzrə aparıcı işçi qrupunun rəis müavini, Çin Xalq Respublikasının Mərkəzi Hərbi Komissiyasının Birləşmiş Qərargahının əməliyyat idarəsinin rəis müavini, general-mayor Vu Tseke bildirib ki, paradda ordunun dördüncü nəsil silahları nümayiş etdiriləcək.

Onun sözlərinə görə, Çin, həmçinin intellektual və pilotsuz sistemlər, şəbəkə və elektron döyüş vasitələrini də nümayiş etdirəcək. O, paradda təqdim olunacaq silahların hamısının yerli istehsal olduğunu vurğulayıb.

Məlumat üçün əlavə edək ki, Pekində keçiriləcək parad sentyabrın 3-də baş tutacaq.