Türkiyə Suriyanın hər yerində davamlı sülh, birlik və bərabərliyi səmimiyyətlə müdafiə edir. Ankara Suriya xalqının bu istiqamətdə səylərini fəal şəkildə dəstəkləyir.

Bu fikri Türkiyə Prezidenti Rəcəb Tayyib Ərdoğan Qətərə səfərdə onu müşayiət edən jurnalistlərlə söhbətində ifadə edib.

Türkiyə liderinin fikrincə, Suriya Demokratik Qüvvələri adlanan qrup Suriya Milli Ordusuna inteqrasiya edilməlidir ki, bu da qonşu ölkənin ərazi bütövlüyünün təmin olunması üçün vacibdir.

Ərdoğan qeyd edib ki, bu məsələni suriyalı həmkarı Əhməd əl-Şaara ilə müzakirə edib.

O, eyni zamanda, Suriyada zaman-zaman baş verən təxribatların mövcudluğuna diqqət çəkib. “Bu gün Suriya çətin inkişaf dövrünü yaşayır, ona görə də bizim Dəməşqi problem və çağırışlarla tək qoymağa haqqımız yoxdur. Ölkələrimiz arasında xüsusi xidmət orqanları və Xarici İşlər Nazirliyi səviyyəsində fəal dialoq qurulub”, - deyən Ərdoğan bütün tərəfləri Suriyanın yeni reallıqlarını tanımağa və qəbul etməyə çağırıb.

Türkiyə Prezidenti əmin olduğunu bildirib ki, Suriya çətin inkişaf dövründən uğurla çıxa biləcək və bütün region bundan faydalanacaq. Bu ilin oktyabrında prezident seçkilərinin keçiriləcəyi Şimali Kipr Türk Cümhuriyyətində (ŞKTC) baş verən proseslərlə bağlı sualı cavablandıran Prezident Ərdoğan Lefkoşada hakimiyyətin sükanı arxasına keçəcək siyasi qüvvədən asılı olmayaraq, Lefkoşanın maraqlarının qorunmasının sarsılmaz aksioma olduğunu vurğulayıb.

Tarixin dərslərinin Türkiyə və Kipr türklərinin yaddaşında təzə olduğunu vurğulayan Ərdoğan vurğulayıb: “Kipr adası uzun illərdir regional və qlobal aktorlar üçün oyun meydançası olub. Bu cür ssenarilərin acı bəhrələri hamıya məlumdur. Ona görə də heç bir qüvvə Kipri faciələr dövrünə qərq etməyə cəhd etməməlidir. Biz Kipr türklərinin bir daha ağrı və faciə yaşamasına imkan verməyəcəyik”.