Pentaqonda akkreditasiya olunmuş ABŞ-nin ən böyük media qurumlarını təmsil edən müxbirləri beyclərini təhvil verib nazirliyin qərargahını tərk ediblər.

Azerimedia.Az-ın xəbər verdiyi kimi, bu barədə "The Guardian" məlumat yayıb.

Qeyd olunur ki, onlar bu yolla ABŞ Müdafiə Nazirliyinin media tərəfindən rəsmi icazəsiz materialların yayımlanmasını qadağan edən yeni qaydalarına etirazlarını bildiriblər.

CNN, FOX, NBC, "Reuters" və "Politico" da daxil olmaqla onlarla media qurumu yeni qaydalarla işləməkdən imtina edib.

"Pentaqonun hazırkı və keçmiş müxbirləri bildirib ki, administrasiyada qərar qəbul edən şəxslərə yaxınlığın olmaması səbəbindən hadisələrin işıqlandırılması, şübhəsiz ki, zərər görəcək. Baxmayaraq ki, onların çoxu məhdudiyyətlərin işi dayandırmayacağını sübut etmək niyyətindədir", - deyə nəşrdə qeyd olunur.

Bildirilib ki, media qurumları onilliklər boyu olduğu kimi ABŞ silahlı qüvvələrinin fəaliyyətini işıqlandırmağa davam edəcəklər.