Bu gecə Astanada 90-cı illərdən bəri dövlət strukturlarında müxtəlif vəzifələrdə çalışmış Yerjan Babakumarov dünyasını dəyişib.

Azerimedia.Az xəbər verir ki, bu barədə Qazaxıstan mediasında məlumat yayılıb.

Polis idarəsinin məlumatına görə, keçmiş məmur döyülərək öldürülüb.

İlkin olaraq müəyyən edilib ki, əvvəllər tanış olan kişilər arasında mübahisə yaranıb və bu, dava ilə nəticələnib. Aldığı xəsarətlər nəticəsində 56 yaşlı Babakumarov ölüb.

"Şübhəli şəxs saxlanılıb və müvəqqəti saxlama məntəqəsinə göndərilib. Qətl faktı ilə bağlı cinayət işi açılıb, məhkəməyə qədər araşdırma aparılır", - deyə polis idarəsindən bildirilib.

Qeyd edək ki, Yerjan Babakumarov 2 mart 1969-cu ildə Qazaxıstanın Taldıkorqan vilayətində anadan olub. Siyasi elmlər namizədidir.

1996-cı ildən dövlət qulluğunda çalışıb. Daxili siyasət şöbəsinin müdir müavini, Prezident Administrasiyasının informasiya-analitik mərkəzinin rəhbəri olub, mədəniyyət və informasiya nazirinin məsul katibi və nazirin müavini kimi çalışıb. O, baş nazirin ofisinin rəhbər müavini, prezident yanında Mərkəzi Kommunikasiyalar Xidmətinin direktoru, dövlət başçısının müşaviri - Prezident Administrasiyasının Təhlil və Proqnozlaşdırma Mərkəzinin rəhbəri vəzifələrində çalışıb.

2019-cu ilin iyul ayından 2022-ci ilin fevralına qədər Babakumarov Almatı akiminin müavini olub.