Hindistanın əfsanəvi aktyoru Dharmendra (Dharam Sinqh Deol) 89 yaşında Mumbaydakı evində vəfat edib.

Azerimedia.Az-ın xəbərinə görə, bu barədə "Times of India" nəşri məlumat verib.

Məlumata görə, məşhur aktyor bu ayın əvvəlində xəstəxanaya yerləşdirilib, daha sonra evə buraxılıb, ailəsi onun yaxşılaşmağa doğru getdiyini bildirib. Lakin noyabrın 24-də günortadan sonra təcili yardım maşını onun evindən çıxarkən görüntülənib. Ailəsi hələ xəbəri təsdiqləməsə də, hindistanlı aktyor Karan Cohar onun vəfatı barədə "Instagram" hesabında məlumat paylaşıb.

"Bu, bütün bir ERANIN sonudur. Meqaulduz. O, həmişə Hindistan kinosunun əsl əfsanəsi olub və həmişə də olacaq. onun xeyir-duaları, qucaqlaşmaları və inanılmaz istiliyi sözlərlə təsvir edilə bilməyəcək qədər darıxılacaq. Bu gün sənayemizdə böyük bir boşluq var. Heç kim tərəfindən doldurula bilməyən bir boşluq. Həmişə yeganə və təkrarolunmaz Dharamci. Biz səni sevirik, əziz cənab. Biz sənin üçün çox darıxacağıq", - deyə o bildirib.