Qazaxıstanda üzü örtən və şəxsin tanınmasına mane olan geyimə (niqab) görə məsuliyyətə cəlb olunma tətbiq edilir.

Azerimedia.Az-ın "Sputnik Qazaxıstan"a istinadən xəbərinə görə, bu barədə parlamentdən məlumat verilib.

İlk belə pozuntuya görə xəbərdarlıq, təkrar pozuntuya görə isə 10 MRP (cərimələrin və dövlət müavinətlərinin hesablanması üçün istifadə olunan aylıq hesablama göstəricisi, 2025-ci ildə 3932 tenge (təxminən 13,5 manat-red.) məbləğində cərimə tətbiq olunacaq.

Bundan əlavə, palata tərəfindən ikinci oxunuşda qəbul edilən "Hüquq pozuntularının profilaktikası haqqında" qanun layihəsi qanunsuz məzmunun yerləşdirilməsi və yayılması, eləcə də dövlət orqanlarının pozuntuların səbəblərini aradan qaldırmaq üçün verdiyi göstərişlərə qəsdən əməl edilməməsinə görə cəzaları nəzərdə tutur.

Məclis bəyan edib ki, sənəd profilaktika subyektlərinin siyahısını ikiqat artırır, əgər əvvəllər onların sayı 13 idisə, indi 26 olacaq.

"Buraya əlavə olaraq ailə dəstək mərkəzləri, mobil qruplar, qəyyumluq orqanları, KİV, gənclərlə iş üzrə agentliklər, səlahiyyətli orqanlar və sahibkarlar da daxil edilir", - deyə məlumatda bildirilib.

Sənəddə ayrıca qeyd olunub ki, təbii və texnogen xarakterli fövqəladə halların qarşısının alınması üçün mülki müdafiə tədbirlərinə əməl etməməyə görə dövlət məmurları və yerli icra hakimiyyəti orqanları üçün yeni məsuliyyət tətbiq edən düzəlişlər mövcuddur.

Bu maddəyə əsasən, Fövqəladə Hallar Nazirliyinin əməkdaşları artıq qayda pozucularını saxlamaq hüququna malikdirlər.