ABŞ administrasiyası Donald Trampın sülh planı çərçivəsində Ukraynanın ciddi ərazi güzəştlərinə getməsində israr edir.

Azerimedia.Az xəbər verir ki, məlumatı "Axios" nəşri yayıb.

Mənbənin bildirdiyinə görə, ABŞ Ukrayna Prezidenti Volodimir Zelenskidən Donbası Rusiyaya təhvil verməsini tələb edir. Kiyevin mövqeyinə görə, bu, avropalı müttəfiqlərlə məsləhətləşmələrin yekunlaşmasına qədər Ağ Evin sülh planının reallaşmasını tezləşdirmək cəhdidir.

ABŞ məmuru bu ehtimalları rədd edib və bildirib ki, Vaşinqton Rusiya Prezidenti Vladimir Putinə də təzyiq göstərib, onun mövqeyini yumşaltmaq istəyir.

Ukrayna rəsmilərinin sözlərinə görə, ötən həftə Donald Trampın müşaviri Stiv Uitkoff və kürəkəni Cared Kuşnerlə Rusiya Prezidenti Vladimir Putin arasında Moskvada keçirilən görüşdən sonra ABŞ-nin təklifləri xeyli sərtləşib. Ukrayna rəsmisinin iddialarına görə, ABŞ tərəfi Mayamidə üçgünlük müzakirələrdən sonra V.Zelenski ilə apardıqları telefon danışığı zamanı ondan Donbası təhvil vermək üçün birbaşa razılıq almağa ümid edirmiş.

Müzakirələrin əsas hissəsi Kremlin hazırda Rusiyanın nəzarəti altında olmayan ərazilər də daxil olmaqla bütün Donbası təhvil vermək tələbi ilə bağlıdır.

Ukrayna, öz növbəsində, ABŞ-dən etibarlı təhlükəsizlik zəmanətləri istəyir. Ukrayna və ABŞ rəsmilərinin sözlərinə görə, bəzi irəliləyişlərə baxmayaraq, ərazi məsələləri və ya təhlükəsizlik zəmanətləri ilə bağlı heç bir nəticə əldə edilməyib.

"Belə təəssürat yaranırdı ki, ABŞ bizi Rusiyanın bütün Donbası ələ keçirmək istəyinə müxtəlif yollarla inandırmağa çalışır və amerikalılar Zelenskinin bütün bunları telefon danışığı zamanı qəbul etməsini istəyirlər", - Ukrayna rəsmisi bildirib.