Hindistan hakimiyyəti İsrail vətəndaşlarına qarşı terror hücumları təhlükəsinin artması səbəbindən Nyu-Delhidə gücləndirilmiş təhlükəsizlik tədbirləri tətbiq edib.

Azerimedia.Az "The Indian Express" nəşrinə istinadən xəbər verir ki, tədbirlər Hindistan kəşfiyyat xidmətlərinin "Əl-Qaidə" və İŞİD terror təşkilatları tərəfindən Nyu-Delhidəki İsrail səfirliyinə mümkün hücumlar barədə məlumatlara əsasən görülüb.

"Polis və hərbçilər yüksək hazırlıq vəziyyətinə gətirilib. İsrail səfirliyi, konsulluqlar, sinaqoq, yəhudi icma mərkəzləri və İsrail vətəndaşlarının ziyarət etdiyi məşhur turistik yerlərdə təhlükəsizlik tədbirləri artırılıb", - deyə yerli hüquq-mühafizə orqanlarının rəsmisi bildirib.

Asayiş keşikçilərinə kütləvi toplantıların, dini tədbirlərin keçirildiyi yerlərdə, hotellərdə, restoranlarda və müəssisələrdə sayıqlığı artırmaq tapşırılıb.

Məlumata görə, Nyu-Delhi ilə yanaşı İsrail vətəndaşlarının daha çox olduqları digər yaşayış məntəqələrində də təhlükəsizlik tədbirləri gücləndirilib.

Xatırladaq ki, dekabrın 14-də Sidney çimərliyində yəhudilərin Hanuka bayramının qeyd olunduğu yerdə terror aktı baş verib. Hadisə zamanı 16 nəfər ölüb, 40-dan çox sakin yaralanıb.