Son günlər "Qarabağ"ın baş məşqçisi Qurban Qurbanovun Quba Olimpiya İdman Kompleksinin (OİK) stadionu ilə bağlı sərt etirazı müzakirə mövzusudur.

Misli Premyer Liqasının 20-ci turunda "İmişli" ilə səfər matçında minimal hesabla qalib gəlmələrinə baxmayaraq, Ağdam klubunun çalışdırıcısı meydançanın bərbad durumuna dair narazılığını sərt şəkildə ifadə edib. O deyib ki, oyunçularının fiziki bərpası 3-4 gün çəkəcək, bu da "Nyukasl"la qarşıdakı (18 fevral) Çempionlar Liqası oyununa təsirini göstərəcək.

Adətən, 53 yaşlı mütəxəssis həm meydanda, həm də mətbuat konfranslarında səbirli, soyuqqanlı davranışı və cavabları ilə seçilir. Bu dəfə isə əksinə olub. Görün, meydançanın durumu necə bərbad halda olub ki, hətta Qurban Qurbanov da emosiyalarını dilə gətirib, eləcə də "İmişli" klubuna irad tutub.

Bəs bu meydançada oyunların keçirilməsinə futbol qurumları niyə razılıq verib və buna görə məsuliyyət kimin üzərinə düşür - Azərbaycan futbolunun ali qərarverici orqanı AFFA-nın, yoxsa çempionatın təşkilatçısı Peşəkar Futbol Liqasının (PFL)?

Oxu.Az xəbər verir ki, yaranmış problemlə əlaqədar həm AFFA, həm də PFL Qol.az saytının sorğularına cavab verib.

AFFA-nın Mətbuat Xidmətinin rəhbəri Murad Axundov təmsilçisi olduğu qurumun adından verdiyi açıqlamada bu məsələyə görə, assosiasiyanın deyil, Peşəkar Futbol Liqasının məsuliyyət daşıdığını bildirib:



"Lisenziyalaşdırma zamanı klublar oynayacağı stadionu sifariş verir. PFL-in də nümayəndələri o stadiona baxış keçirib, rəy bildirirlər. Daha sonra isə onlar bizə rəsmi müraciət edirlər ki, bu stadionda oyun keçirmək olar, ya yox? Quba OİK-in Stadionunu "İmişli" Futbol Klubu sifariş etmişdi. Daha sonra PFL-in əməkdaşları orada təftiş keçirmişdilər və sonra bizə bildirmişdilər ki, bu stadionda Premyer Liqa matçı oynamaq olar. Xatırlayırsınızsa, çatışmazlıqları aradan qaldırmaq üçün müraciət əsasında Şamaxı şəhər stadionu AFFA tərəfindən ikioyunluq "İmişli"yə verilmişdi. Daha sonra onlar Quba stadionunda oynadılar. Bu da sırf Peşəkar Futbol Liqasının rəyindən, onların təftişindən sonra baş vermişdi.

AFFA olaraq Premyer Liqa matçının oyunlarını keçirmək üçün stadionlara baxışı və təftişi biz etmirik. Bu, PFL-in məsuliyyətindədir. Həmçinin Tovuz şəhər stadionu və Yevlax şəhər stadionları da bu mövsüm sırf PFL tərəfindən təftiş olunub. Müvafiq rəy əsasında onlar bizə bildirmişdilər ki, bu stadionlarda oyun keçirmək mümkündür. Yəni biz AFFA olaraq Premyer Liqada çıxış edən heç bir klubun stadionuna rəy bildirmirik. Bu, tam olaraq PFL-in məsuliyyətindədir".

Məsələ ilə əlaqədar Peşəkar Futbol Liqasının prezidenti Elxan Səmədov bildirib ki, rəhbəri olduğu qurumun qəbul etdiyi hər bir qərarın əsasları var:


"Ümumiyyətlə, "İmişli" niyə Quba OİK stadionunda oynayır?" sualına cavab tapmaq üçün bir az əvvələ qayıtmaq və qlobal məqamlara toxunmaq lazımdır.

Bildirmək istərdik ki, "İmişli" klubu Premyer Liqaya vəsiqə qazanacağı təqdirdə ev oyunlarını keçirmək üçün mətbuatda yazıldığı kimi Şamaxı və ya Quba stadionunu sifariş etməyib. Onlar Premyer Liqaya vəsiqə qazanacaqları təqdirdə İmişli şəhər stadionunda oynayacaqlarını bildiriblər və bu stadionda olan çatışmazlıqlar ətraflı şəkildə müvafiq instansiyalara biz tərəfdən bildirilib. Nəinki "İmişli", hətta Premyer Liqaya vəsiqə qazanan komandaların sayında dəyişiklik edildikdən sonra potensial Premyer Liqa komandalarının stadionlarına ətraflı şəkildə baxış keçirilib və bütün çatışmazlıqlar tam şəkildə göstərilib. "İmişli" klubunun rəhbərliyi tərəfindən İmişli stadionunun Premyer Liqa oyunları üçün hazır vəziyyətə gətirilə bilməməsinin səbəbi artıq ictimaiyyətə açıqlanıb.

Prosesə yanaşma baxımından PFL eyni addımları "Karvan" klubundan da tələb edib. Yevlax təmsilçisi imkanları çərçivəsində öz arenasını oynanılacaq duruma gətirib. Bura qədər isə stadionda Premyer Liqa standartlarına uyğunluq baxımından xeyli problemlər yaranmışdı. Peşəkar Futbol Liqası olaraq, ən adi elementlərə qədər - isti su, avtodayanacaq, çəkiliş meydançaları, media sektor, "miks" (qarışıq, əsasən TV müsahibə üçün) zona, mətbuat konfransı otağı, paltardəyişmə otağı, eləcə də xüsusi önəmli məqamlardan biri kimi qazonla bağlı tələb-məsləhətlərimizi verdik və klub əməl etdi. "Karvan" stadionunun qazonunun FIFA sertifikatı alması yönündə tələblərimizdən çəkilmədik və bütün addımlardan sonra məkanı yoxlama oyunu ilə sınaqdan keçirib razılıq verdik.

Bu gün isə Yevlax təmsilçisi, hətta "Kəpəz" klubunun da istifadəsinə imkan yaradıb dəstək olacaq bir məkana sahibdir".

E.Səmədovun dediyinə görə, Premyer Liqanın startı ərəfəsində stadionlarla bağlı durum fərqli idi:

"Belə ki, Qəbələ şəhər stadionundan yerli komanda ilə yanaşı "Kəpəz", Şamaxı şəhər stadionundan yerli komanda ilə yanaşı "Karvan" klubu istifadə edirdi. "Bayıl Arena" Premyer Liqa üçün qəbul olunmadığına, "Kapital Bank Arena"nın qazonu isə hazır olmadığına görə "İmişli" klubu Quba OİK stadionuna üz tutdu. Amma burada ilkin təftiş zamanı xeyli problemlər aşkarlandı. Bura çəkiliş platformaları, media sektor, "miks" (qarışıq, əsasən TV müsahibə üçün) zona, qazon, soyunub-geyinmə otaqlarında olan problemlər daxil idi. Həmin problemlərin aradan qaldırılması üçün tələb olunan vaxtda AFFA və PFL-in təşəbbüsü ilə "İmişli" ikioyunluq ev görüşlərini AFFA-dan icarəyə götürdüyü Şamaxı şəhər stadionunda keçirdi və yekun təftişdən sonra ümumi infrastruktur imkanları nəzərə alınaraq "İmişli"yə Quba OİK-də oynamaq icazəsi verildi.
Bəli, biz də qəbul edirik ki, hazırda qış ayları olduğu üçün Quba OİK stadionunun qazonu yaxşı vəziyyətdə deyil, amma biz klubla birlikdə, demək olar ki, hər oyundan öncə, hər oyundan sonra qazonun oyunlara nisbətən hazır olması üçün çalışırıq. Quba OİK stadionunda Premyer Liqa oyunlarının keçirilməsi yönündə işlər görüldükdən sonra PFL qərar verib, amma qərarın özəyində yuxarıda sadalanan məqamlar və ümumi infrastruktur vəziyyətindən yaranmış ümumi mənzərə dayanıb. "Hazırda klubun başqa stadionda oynamaq şansları necədir?" sualı isə təhlil olunmalıdır. PFL, öz növbəsində, "İmişli"nin bu rəqibinə bu, digər rəqibinə başqa imkanların yaradılmasının tərəfdarı deyil. Biz PFL olaraq, idman prinsiplərinin qorunması və hər bir komandaya ortaq şəraitin yaradılmasına çalışırıq".