Ermənistan Milli Assambleyasının sədri Alen Simonyan brifinq zamanı Qarabağla bağlı bir sıra diqqətçəkən açıqlamalar verib.

Azerimedia.Az-ın erməni KİV-nə istinadən məlumatına görə, o bildirib ki, Qarabağın Azərbaycana məxsus olduğu qəbul edilirsə, onun “Artsax” adlandırılması məntiqsizdir. Simonyan əlavə edib ki, eyni yanaşma ilə Ermənistan ərazilərinə Azərbaycan adları verildikdə buna etiraz olunması anlaşılmazdır.

Spiker çıxışında təhlükəsizlik məsələlərinə də toxunaraq qeyd edib ki, Ermənistanın “əsrlik dostu” və bölgədə hərbi mövcudluğu olan tərəf insanlara sadəcə ehtiyatla ərazini tərk etməyi tövsiyə edib.

Simonyan vurğulayıb ki, Ermənistanın qonşu ölkələrə qarşı ərazi iddiaları yoxdur və olmamalıdır. O, həmçinin sabiq prezident Robert Köçəryan dövrünə toxunaraq sual edib ki, həmin illərdə ölkə gücləndirilib, yoxsa şəxsi maraqlar ön planda olub.

Spiker qeyd edib ki, ölkənin siyasi gündəmində iki əsas istiqamət mövcuddur: sülh və müharibə. Onun sözlərinə görə, 7 iyunda keçiriləcək seçim bu iki yanaşma arasında qərar olacaq və hakim “Vətəndaş Müqaviləsi” partiyası sülh gündəmini təmsil edir, əsas müxalif qüvvələr isə fərqli mövqedə çıxış edir.