"Rəqəmsal transformasiya dövründə Azərbaycan hökuməti cəmiyyətin bütün təbəqələri üçün etibarlı və müasir rəqəmsal infrastruktur qurmağa çalışır. Bu infrastrukturun ən vacib elementlərindən biri də yüksəksürətli internetin əlçatanlığıdır".

Bu barədə Baş nazir Əli Əsədov "Digital Almaty 2025" beynəlxalq rəqəmsal forumunda çıxışında deyib.

O bildirib ki, bu istiqamətdə atılan ən mühüm addımlardan biri "Onlayn Azərbaycan" layihəsidir.

"Layihə çərçivəsində bütün yaşayış və kommersiya obyektlərinin 99%-dən çoxu yüksəksürətli genişzolaqlı internetə qoşulub", - deyə hökumət başçısı qeyd edib.

Baş nazir dövlət idarəçiliyinin rəqəmsallaşdırılması sahəsində Azərbaycanın bir sıra uğurlu layihələr həyata keçirdiyini vurğulayıb, "Rəqəmsal hökumət" platformasının yaradılmasını, dövlət qurumları arasında məlumat mübadiləsini yaxşılaşdıran "Rəqəmsal körpü" sistemini və dövlət idarəçiliyinin effektivliyini artıran "Hökumət buludu" kimi layihələri bunlara bariz nümunə kimi göstərib.

"Rəqəmsal transformasiya təkcə texnoloji proses deyil, həm də beynəlxalq əməkdaşlığı gücləndirmək üçün bir fürsətdir. O nəinki yeni imkanlar açır, həmçinin birgə qərarlar tələb edən mürəkkəb çağırışlar edir. Azərbaycan beynəlxalq əməkdaşlığın gücləndirilməsinə prioritet əhəmiyyət verir və dayanıqlı rəqəmsal gələcəyin yaradılması üçün birgə işləməyə hazırdır. Əminəm ki, bugünkü forum bu istiqamətdə qarşılıqlı fəaliyyətimizə mühüm töhfə verəcək", - deyə baş nazir sözlərini yekunlaşdırıb.