"Gülsatanların bayramı" adlandırılan günlərdən biri də 8 Mart ərəfəsidir. Beynəlxalq Qadınlar Günündən öncə Bakının gül dükanları sevdiklərini, xanımlarını, analarını, qızlarını sevindirmək istəyən bəylərlə dolub-daşır.

Oxu.Az-ın əməkdaşı gül mağazalarına baş çəkib, bu bayramda üzləri güldürəcək gül buketlərinin neçəyə başa gələcəyini araşdırıb.

Təqdim edilən çiçək çeşidləri elə qiymətləri kimi müxtəlifdir. Bazarda ən ucuz güllər zanbaqlardır - qiyməti 1 ədəd üçün 2 manat 50 qəpiklə 3 manat arasında dəyişir.

Qızılgüllər zirvədən düşmür - ucuzu 4, bahası 6 manatadır.

Gül satışı ilə məşğul olan Fuad Paşazadə qeyd edir ki, bayramla əlaqədar olaraq hazırda güllərə tələbat artıb:



"Alıcılıq qabiliyyəti yaxşıdır. Hazırda qiyməti daha münasib olduğu üçün zanbaqlar daha çox satılır. Üç-beş ədəd zanbaqdan buket bağlatdıranlar çoxdur. Qızılgüldə də tələbat yaxşıdır, birinin qiyməti 6 manatdır. Qızılgül buketi istəyən də olur, tək alan da. Belə buket üçün minimum beş qızılgül olmalıdır ki, gözəl alınsın.

Nərgiz güllərimiz var, birinin qiyməti 6 manatadır.

Çobanyastığından da gözəl buketlər hazırlayırıq. Qiyməti 40-45 manatdan başlayır. Buketə görə qiymət dəyişir".

Digər bir satıcı Natiq Novruzov da alıcıların qızılgül və zanbağa üstünlük verdiklərini deyir:


"Yerli qızılgülün ədədi 4 manata, xarici qızılgülün biri isə 6 manatadır. Zanbaqların ədədi 2.5 manatadır. Çöl çiçəkləri də yaxşı alınır. Bir ədədi 3 manatadır. Buket formasında hazır güllər alanlar da az deyil. Onların da qiyməti 20 manatdan başlayır, 100 manata qədər davam edir.

Səbət gülləri də satırıq, 20-45 manat aralığında dəyişir qiyməti. Səbətlərə tələbat yaxşı olsa da, zanbaqlar qədər çox satılmır".

Başqa bir satıcı Fərid Məcidov alverdən məmnundur:



"Şükür, alıcılıq qabiliyyəti yaxşıdır. Sevənlər əzizlərinə gözəl güllərdən alırlar. Üstünlük daha çox kol şəklində olan qızılgüllərədir. Onların qiyməti standart olaraq 15 manatdır. Zanbaqlar da yaxşı satılır. Yerli zanbağın ədədi 2 manat 50 qəpiyə, xarici zanbağın dənəsi 3 manatadır. Keçən illə müqayisədə qiymətlərdə heç bir dəyişiklik olmayıb. Əvvəl necə idisə, indi də elədir. Qızılgülün bir ədədi 5 manatadır. Bir buket üçün 11, 51, 101 qızılgül alan da olur. Bu da gül alanın büdcəsinə baxır".

Qısa hesablamalarımıza görə, ən ucuz gül hədiyyəsi iki manat yarıma, 101 qızılgüldən ibarət buket 505 manata başa gələcək. Amma son nəticədə bu gül dəstələrinin doğurduğu təbəssüm eyni dəyərdədir - yəni qiymətsiz...

Bayramınız mübarək, əziz qadınlar!