Türkiyənin regional gücə çevrilməsi istiqamətində sürətlə irəliləməsi və Qəzza, Suriya ilə Şərqi Aralıq dənizində artan təsiri yeni geosiyasi gərginlik yaradıb.

Azerimedia.az xəbər verir ki, İsrail Knessetində keçirilən diqqətçəkən iclasda İsrail, ABŞ, Yunanıstan və Kipr Rum administrasiyası nümayəndələri “Türkiyənin ambisiyalarının qarşısının alınması” mövzusunu müzakirə ediblər.

İsrail parlamentinin üzvü Ohad Tal çıxışında İsrail–Yunanıstan–Kipr–ABŞ əməkdaşlığının gücləndirilməsini “strateji aktiv” adlandıraraq bunun Türkiyənin regional siyasətinə cavab olduğunu bildirib. O vurğulayıb ki, bu ittifaqın məqsədi bölgədə güc balansını qorumaqdır.

Yaxın Şərq Forumunun baş direktoru Qreq Roman Türkiyənin son illərdə Qəzza ilə bağlı sərt ritorikası və Suriyadakı təsirindən narahat olduqlarını deyərək Ankara üçün F-35 proqramına qayıdışa qarşı çıxdığını açıqlayıb. ABŞ Konqresinin üzvü Rendi Fayn da Türkiyənin F-35 qırıcıları almasına qarşı olduğunu bildirərək NATO çərçivəsində belə bir addımın “məntiqsiz” olacağını deyib.

Digər konqresmen Bred Şnayder isə regionda tərəfdaş və rəqiblərin “aydın müəyyənləşdirilməli” olduğunu vurğulayıb. “Yaxın Şərqdə tərəfdaşlarımızın və düşmənlərimizin kim olduğunu aydın şəkildə bilməliyik...", -o qeyd edib.

Knessetdə keçirilən iclasda Yunanıstanın NATO nümayəndə heyətinin rəhbəri Dimitris Kairidis və Kipr parlamentinin Xarici İşlər Komitəsinin sədri Harris Georgiades də iştirak edib. Görüşdə bir sıra yüksək səviyyəli təhlükəsizlik və strategiya ekspertləri də yer alıb.
Regionda yeni ittifaqın formalaşması Ankaranın yüksələn roluna qarşı geosiyasi qarşıdurmanın daha da sərtləşəcəyindən xəbər verir.