ABŞ ilə qarşıdurma fonunda İran ərazisində 20-yə yaxın mülki hava gəmisi zərər görüb.

Azerimedia.Az-ın məlumatına görə, bu faktı İran Hava Yolları Assosiasiyasının katibi Maqsud Əsədi Samani açıqlayıb.

"ABŞ və İsrail qüvvələrinin İslam Respublikasının aeroportlarına təşkil etdiyi aviazərbələr nəticəsində İranın 20 ədəd civarında mülki təyyarəsinə ziyan dəyib", - deyə Maqsud Əsədi Samani vurğulayıb.

Assosiasiya rəsmisinin sözlərinə əsasən, gərginlikdən öncə mövcud olan 300-ə yaxın hava gəmisindən cəmi 150-si istismara yararlı olub:

"Zərər görmüş təyyarələri hesaba aldıqda hazırda mülki aviasiyanın sərəncamında 130-a yaxın işlək hava gəmisi var".

Hava limanlarının infrastrukturu barədə məlumat verən katib mərkəzi uçuş-enmə zolaqlarının salamat qaldığını diqqətə çatdırıb. Bu səbəbdən hava məkanında tam təhlükəsizlik yarandıqdan sonra ölkə aeroportlarının potensialının 90-95 faizindən çoxu qısa müddətdə öz fəaliyyətini bərpa etmək imkanına malikdir.

Xatırladaq ki, bir müddət öncə paytaxt Tehran da daxil olmaqla, İranın altı aeroportunda aviasiya əlaqələrinin qismən bərpa edildiyi barədə xəbərlər yayılmışdı. Ölkənin hava məkanının məhdud şəkildə açılması barədə qərardan sonra - aprel ayının 18-də Omandan İrana doğru ilk sərnişin reysi həyata keçirilib. Bununla belə, Rusiyanın "Rosaviasiya" qurumu İranın hava məkanının Rusiya aviaşirkətləri üçün mayın 15-dək qapalı qalacağını bəyan edib.