ABŞ-nin İranla münaqişə üzrə ümumi xərcləri bir trilyon dollara çata bilər.

Azerimedia.Az xəbər verir ki, bu barədə CNN telekanalı Harvard Kennedi Məktəbinin eksperti Linda Bilmsin təqdim etdiyi qiymətləndirməyə istinadən məlumat yayıb.

O, yalnız qısamüddətli xərcləri deyil, həm də uzunmüddətli perspektivi nəzərə alıb.

Qeyd olunur ki, xüsusilə, ABŞ-nin sursat ehtiyatlarını, o cümlədən yüksək dəqiqlikli silahları bərpa etməsi bir neçə il çəkəcək. İstifadə olunmuş "Tomahawk" raketinin dəyəri hazırda ədədi 2 milyon dollar olaraq qiymətləndirilir, lakin onun əvəzlənməsi təxminən 3.5 milyon dollara başa gələ bilər.

Münaqişədə istifadə olunan texnikanın, o cümlədən aviadaşıyıcı qruplarının orta və uzunmüddətli xidmət xərcləri yaxın 4-5 ildə onlarla, hətta yüzlərlə milyard dollara çata bilər. Bundan əlavə, ABŞ münaqişədə iştirak edən 55 min hərbçi qarşısında sosial öhdəliklərini yerinə yetirməli olacaq.

Bundan başqa, ekspert münaqişənin dünya iqtisadiyyatına təsirini nəzərə alıb ki, bu da ABŞ-nin özündə yanacaq və mal qiymətlərinin artmasına gətirib çıxarıb. Belə ki, Birləşmiş Ştatlarda bir qallon (3.785 litr) benzinin (3.79 litr) orta qiymətinin yaxın zamanlarda 5 dollara qədər yüksəlməsi istisna edilmir.

Daha əvvəl Pentaqon ABŞ-nin İrana qarşı hərbi əməliyyatının dəyərinin artıq 29 milyard dollara yaxınlaşdığını elan edib. Bu məbləğə avadanlığın təmiri və dəyişdirilməsi xərcləri, həmçinin regiondakı şəxsi heyətin saxlanması üzrə əməliyyat xərcləri daxildir.