Mütəxəssislər 29 dekabrda Muan hava limanında qəzaya uğrayan "Jeju Air" təyyarəsinin pilot kabinəsindəki səs qeydedicisinin məlumatlarını əldə edib və onları səs fayllarına çevirirlər.

Azerimedia.Az bu barədə TASS-a istinadən xəbər verir.

"Pilot kabinəsindəki danışıqların səs qeydedicisindən məlumatların əldə edilməsi başa çatıb. Bu gün onların səs fayllarına çevrilməsi işinə başlanılıb", - deyə Cənubi Koreya Nəqliyyat Nazirliyinin Mülki Aviasiya Departamentinin direktoru Cu Conq Van brifinqdə bildirib.

Mülki aviasiya rəsmisi əlavə edib ki, iş mümkün qədər tez həyata keçiriləcək. Dekabrın 29-da "Boeing 737-800" təyyarəsində olan 181 nəfərdən 179-u həlak olub ki, bu da Koreya Respublikası ərazisində ən böyük aviaqəza kimi tarixə düşüb.

İkinci qara qutu - uçuş məlumatlarının bort qeydedicisi bəzi xarici zədələr alıb. Bu onun deşifrə edilməsi üçün lazım olan vaxtı artıracaq. Koreyalı ekspertlərin fikrincə, uçuş məlumatlarının bort qeydedicisinin deşifrə edilməsi təxminən bir ay çəkəcək. Əgər hər iki cihaz zədələnməsəydi, deşifrə təxminən bir həftə çəkərdi.

Koreyalı mütəxəssislər deşifrə zamanı çətinliklərlə üzləşərsə, qara qutular Milli Nəqliyyat Təhlükəsizliyi Şurasından (NTSB) olan ABŞ-li həmkarlarına təhvil verilə bilər. Milli Nəqliyyat Təhlükəsizliyi Şurası və "Boeing" şirkətindən ibarət ABŞ nümayəndə heyətinin tərkibində təxminən 10 nəfər Muana gəlib. Onlar koreyalı həmkarları ilə birlikdə ilk növbədə beton özül üzərində radioantenlərin quraşdırıldığı torpaq təpəsi şəklində olan konstruksiyanı araşdırıblar.