Culfa rayonunun Bənəniyar su anbarında balıqların kütləvi tələfatının səbəbləri açıqlanıb.

Bu barədə Azərbaycan Dövlət Su Ehtiyatları Agentliyinin tabeliyində olan Regional Su Meliorasiya Xidməti publik hüquqi şəxsin Naxçıvan Su Meliorasiya Sistemlərinin İstismarı İdarəsindən bildirilib.

Məlumatda qeyd olunub ki, suyun azalması nəticəsində anbarın bəzi hissələrində kiçik gölməçələr yaranıb:

"Bu kiçik gölməçələrdə suyun həcmi az olduğu üçün oksigen səviyyəsi kritik həddə düşüb. Nəticədə balıqların təbii yaşayış mühitində oksigen çatışmazlığı yaranıb və tələfat müşahidə olunub. Bu vəziyyət su hövzəsinin ekoloji tarazlığına ciddi mənfi təsir göstərib. Suyun səviyyəsinin azalması əsasən bölgədə uzunmüddətli quraqlıq dövrünün davam etməsi, çay axınlarının zəifləməsi, yağıntı miqdarının normadan aşağı düşməsi və buxarlanmanın artması ilə əlaqədardır.

Oktyabrın 16-da Bənəniyar su anbarında baş verən təbii hadisə ilə bağlı Naxçıvan Su Meliorasiya Sistemlərinin İstismarı İdarəsi, Naxçıvan Muxtar Respublikası Fövqəladə Hallar Nazirliyi, eləcə də Ekologiya və Təbii Sərvətlər Nazirliyinin əməkdaşları əraziyə baxış keçiriblər. Birgə aparılan tədbirlər çərçivəsində balıqların oksigen çatışmazlığından qorunması və onların təbii yaşayış mühitinə uyğun şəraitdə saxlanmasını təmin etmək üçün kiçik gölməçələrdə qalan canlı balıqlar su anbarının hələ dolu olan hissələrinə köçürülüb".

Məlumatda vurğulanıb ki, gigiyenik vəziyyətin qiymətləndirilməsi məqsədilə Naxçıvan Muxtar Respublikasının Qida Təhlükəsizliyi Agentliyi tərəfindən su və ətraf nümunələr götürülüb, analizlər aparılıb:

"Analizlərin cavabları məlum olduqdan sonra görüləcək müvafiq tədbirlər müəyyən ediləcək. Hazırda su anbarının balıqlar tələf olan kiçik hissəsindəki bütün canlı balıqlar xilas edilib. Bu gün isə su anbarının təmizlənməsi işləri həyata keçirilir".