AFEN" plazada baş verən partlayışın səbəbləri araşdırılır".

Azerimedia.Az xəbər verir ki, bunu jurnalistlərə açıqlamasında Fövqəladə Hallar Nazirliyinin Xüsusi Riskli Xilasetmə Xidmətinin idarə rəisi Toğrul Mehdiyev deyib.



O bildirib ki, FHN-in "112" qaynar telefon xəttinə Bakı şəhəri, Nərimanov rayonunda obyektdə partlayış baş verməsi barədə ilkin məlumat daxil olub.

"FHN-in Dövlət Yanğından Mühafizə və Xüsusi Riskli Xilasetmə xidmətləri və Bakı Regional Mərkəzinin qüvvələri əraziyə cəlb olunublar. Məlum olub ki, yanğınla müşayiət olunmayan partlayış baş verib. Nəticədə yeddi nəfər xilas edilərək aidiyyəti üzrə təhvil verilib. Partlayışın başvermə səbəbi araşdırılır".





10:33

Bakının Nərimanov rayonu, Ə.Rəcəbli küçəsində baş verən partlayışda xəsarət alanların vəziyyəti açıqlanıb.

Bu barədə Kliniki Tibbi Mərkəzdən məlumat verilib.

"Nərimanov rayonu, Ə.Rəcəbli küçəsində obyektdə partlayış baş verməsi səbəbi ilə xəsarət alan beş nəfər Kliniki Tibbi Mərkəzə hospitalizasiya olunub.

Onlardan bir nəfərə (kişi) termiki yanıq, dörd nəfərə isə (biri kişi, üçü qadın) bədənin müxtəlif nahiyələrinin müştərək travmaları diaqnozu təyin olunub.

Hazırda pasiyentlərin müalicəsi tibb müəssisəsində davam etdirilir. Vəziyyətləri orta ağır olaraq qiymətləndirilir".

Azerimedia.Az hadisə yerindən görüntüləri təqdim edir:



10:13

Bakı şəhəri, Nərimanov rayonu, Əhməd Rəcəbli küçəsində partlayışda beş nəfər xəsarət alıb.

Bu barədə Tibbi Ərazi Bölmələrini İdarəetmə Birliyindən məlumat verilib.

"Noyabrın 24-ü saat 09:00-da Respublika Təcili və Təxirəsalınmaz Tibbi Yardım Mərkəzinə Nərimanov rayonu, Ə.Rəcəbli küçəsində obyektdə partlayış baş verməsi səbəbi ilə çağırış qeydə alınıb.

Dərhal iki təcili tibbi yardım briqadası çağırış ünvanına cəlb olunub.

Təcili tibbi yardım briqadası tərəfindən beş nəfərə (ikisi kişi, üçü qadın olmaqla) yerində ilkin tibbi yardım göstərilib və onlar müştərək travmalarla Kliniki Tibbi Mərkəzə hospitalizasiya olunublar".

Qeyd edək ki, partlayış AFEN plazada baş verib.



10:05

Bakı şəhəri, Nərimanov rayonu, Əhməd Rəcəbli küçəsində partlayış olub.

Azerimedia.Az APA-ya istinadən xəbər verir ki, partlayış obyektdə qeydə alınıb. Partlayış nəticəsində yeddi nəfər xəsarət alıb.

09:45

Paytaxtın Nərimanov rayonu ərazisində yerləşən ofislərin birində baş vermiş partlayışla əlaqədar polis əməkdaşları hadisə yerinə cəlb ediliblər.

Bu barədə Daxili İşlər Nazirliyinin (DİN) Mətbuat Xidmətindən məlumat verilib.

"Polis əməkdaşları tərəfindən hadisə yeri mühafizə edilərək zəruri təhlükəsizlik tədbirləri görülür", - deyə məlumatda bildirilib.

09:29

Bakı şəhəri, Nərimanov rayonu, Ə.Rəcəbli küçəsində obyektdə partlayış baş verib.

Azerimedia.Az xəbər verir ki, bu barədə Fövqəladə Hallar Nazirliyi (FHN) məlumat yayıb.

Bildirilib ki, məlumatla əlaqədar dərhal əraziyə FHN-in Dövlət Yanğından Mühafizə və Xüsusi Riskli Xilasetmə xidmətləri və Bakı Regional Mərkəzinin qüvvələri cəlb olunub.