"Qarabağ"ın UEFA Çempionlar Liqasının Liqa mərhələsinə vəsiqə qazanması təkcə Ağdam klubuna deyil, ölkə futboluna da maddi fayda gətirəcək.
Qitənin ali futbol qurumunun qaydalarına əsasən, Çempionlar Liqasının əsas mərhələsinə yüksələn klubların təmsil etdiyi ölkələrin digər komandalarına həmrəylik məqsədilə maddi dəstək göstərilir. Azərbaycana gəldikdə, Premyer Liqada yarışan 12 klubdan 11-nin ("Qarabağ" istisna olmaqla) hər birinə ümumilikdə 800 min avro (bugünkü məzənnə ilə təxminən 1 milyon 580 min manat) məbləğində vəsait ayrılması gözlənilir.

Yardım iki mərhələdə ödəniləcək: əvvəlcə 550 min, daha sonra 250 min avro. Lakin qeyd olunur ki, bu məbləğ son olmayacaq və "Qarabağ"ın Liqa mərhələsində uğurlu çıxışı digər klubların da mükafatını artıracaq.

Ağdam klubu isə təkcə Liqa mərhələsinə düşməsi ilə artıq 18 milyon 620 min avro qazanıb. UEFA, həmçinin təsnifat mərhələsində iştirak üçün əlavə bonusların, habelə Liqa mərhələsində qələbə (2 milyon 100 min avro) və heç-heçə (700 min avro) üçün mükafatların ödəniləcəyini nəzərdə tutub.