İspaniyanın “Real” futbol klubu ardıcıl ikinci il dünyanın ən bahalı futbol brendləri siyahısında birinci yeri tutub.

Azerimedia.az xəbər verir ki, bu barədə “Brand Finance” konsaltinq şirkəti məlumat yayıb.

Ötən il ərzində Madrid klubunun brend dəyəri 14 faiz artaraq 1,92 milyard avroya çatıb.

“Bu, klubun öz yüksək standartlarına görə nisbətən zəif çıxışları nəzərə alınmaqla diqqətəlayiq artımdır. 2021-ci ildən bəri ilk dəfə komanda heç bir mühüm titul qazanmasa da, ardıcıl ikinci mövsüm rekord gəlir əldə edir”, – deyə hesabatda vurğulanır.

Reytinqin ikinci pilləsində İspaniyanın “kral klubu” “Real”ın əsas rəqibi “Barselona” qərarlaşıb. Komanda həm İspaniya çempionatını, həm də kubokunu qazanıb, nəticədə brend dəyəri 11 faiz artaraq 1,71 milyard avroya yüksəlib. Bu göstərici Barsa klubuna mövsümü titulsuz başa vuran və brend dəyəri 11 faiz azalaraq 1,44 milyard avroya enən İngiltərənin “Mançester Siti” klubunu qabaqlamağa imkan verib.

İlk beşlikdə həmçinin “Liverpul” və “Pari Sen-Jermen” yer alıb (hər ikisi – 1,4 milyard avro).

Onluğun son pillələrini isə Almaniyanın “Bavariya”sı və İngiltərənin dörd klubu – “Mançester Yunayted”, “Arsenal”, “Çelsi” və “Tottenhem” tutur.

Əlli ən yaxşı futbol klubunun brendləri arasında İngiltərə komandalarının payı 42 faiz təşkil edir. Ölkələr üzrə sıralamada ikinci yerdə 21,3 faiz göstərici ilə İspaniya, daha sonra Almaniya (15,7 faiz), İtaliya (8,8 faiz) və Fransa (7,7 faiz) qərarlaşıb.

Ümumilikdə, araşdırmaya daxil olan klubların brend dəyəri son bir ildə 5,5 faiz artaraq 21,9 milyard avroya çatıb.