Almaniya şirkətləri 2025-ci ilin birinci yarısında ümumilikdə 37 700 nəfərin işdən çıxarılmasını planlaşdırır. Bu, COVID-19 pandemiyasından bəri bir ilin ilk altı ayı üçün qeydə alınan ən yüksək göstəricidir.

Azerimedia.Az-ın "RIA Novosti"yə istinadla məlumatına görə, bu barədə Avropa yenidənqurma monitorinqinin məlumatlarında qeyd olunur.

Bildirilir ki, Avropanın ən böyük iqtisadiyyatında kütləvi ixtisar meyli artıq üçüncü ildir ki, artmaqda davam edir. 2022-ci ilin ilk yarısında Almaniya biznesi 9 600 nəfəri ixtisar etməyi planlaşdırırdısa, 2025-ci ildə bu rəqəm dörd dəfə artaraq 37 700-ə çatıb.

Hazırkı göstəricilər pandemiya dövründə - 2020-ci ildəki 48 100 nəfərlik rekord səviyyəni ötməsə də, digər ciddi iqtisadi böhran dövrlərinə yaxınlaşır. Məsələn, 2008-2009-cu illərdəki qlobal maliyyə böhranı zamanı Almaniya şirkətləri 40 000, 2011-12-ci illərdəki Avropa borc böhranı dövründə isə 40 800 nəfəri işdən çıxarmağı planlaşdırmışdı.

Ən çox zərbə alan sahə isə ənənəvi olaraq Almaniya iqtisadiyyatının onurğa sütunu hesab edilən sənaye sektoru olub. Ümumilikdə 28 sənaye müəssisəsi 20 700 iş yerini ixtisar edəcəyini açıqlayıb. Xüsusilə avtomobil sənayesində vəziyyət ağırdır - "Porsche" və "Audi" də daxil olmaqla doqquz zavod ciddi ixtisar planlarını elan edib.

Logistika sahəsində cəmi iki şirkət 8 200 nəfəri işdən çıxarmağı nəzərdə tutur. Pərakəndə ticarətdə isə doqquz təşkilat 4 500 nəfərlik ixtisar planı ilə çıxış edib. Maliyyə sektoru da bu prosesdən kənarda qalmayıb - iri banklardan biri 3 300 nəfərin işdən çıxarılacağını bildirib.

Sağlamlıq, enerji, tikinti və media sahələrində isə daha azmiqyaslı, lakin nəzərəçarpacaq ixtisarlar gözlənilir - təxminən 1 000 nəfər.