Malayziya rəhbərliyinin İsrail vətəndaşlarının ölkədən deportasiya edilməsi ilə bağlı son bəyanatları fonunda bu ölkənin ABŞ-dəki səfiri Dövlət Departamentinə çağırılıb.

Azerimedia.Az xəbər verir ki, bu barədə "Reuters" məlumat yayıb.

Qeyd olunub ki, Malayziya dövləti İsraili tanımır və onunla heç bir diplomatik əlaqəyə malik deyil. İyulun 16-da Malayziyanın Baş naziri Ənvər İbrahim bildirib ki, Coxor əyalətində "Network School" təhsil proqramının fəaliyyəti ilə bağlı aparılan araşdırma zamanı İsrail vətəndaşlarının ölkədə olması təsdiqlənərsə, hökumət onların hamısını deportasiya edəcək. Yoxlamaların aparılmasına səbəb Coxorun "Forest-Siti" ərazisində fəaliyyət göstərən həmin proqramda israillilərin ehtimal olunan iştirakı barədə yayılan məlumatlar olub.

Bu hadisələrə cavab olaraq səkkiz amerikalı konqresmen ABŞ dövlət katibi Marko Rubioya məktub ünvanlayaraq Malayziya hökumətinin atdığı addımlardan hiddətləndiklərini ifadə ediblər. Onlar həmçinin Dövlət Departamentini Malayziya ilə iqtisadi əlaqələrə yenidən baxmağa və müdafiə sahəsindəki bəzi müştərək proqramların maliyyələşdirilməsini dayandırmağa çağırıblar.