Cari ilin yanvar-iyun aylarında ölkədə 25,2 milyard kubmetr təbii qaz hasil edilib ki, bu da ötən ilin eyni dövrü ilə müqayisədə 0,4 faiz çoxdur.

Energetika Nazirliyindən bildirilib ki, qazın 6,6 milyard kubmetri “Azəri-Çıraq-Günəşli”nin, 13,8 milyard kubmetri “Şahdəniz”in, 0,8 milyard kubmetri “Abşeron” yatağının, 4 milyard kubmetrə yaxını isə SOCAR-ın payına düşüb.

Bu dövrdə xaricə qaz satışı 4,72 faiz azalaraq 12,1 milyard kubmetr təşkil edib. Bundan 6,1 milyard kubmetr (4,7 faiz azalma) Avropaya, 4,9 milyard kubmetr (2 faiz azalma) Türkiyəyə, 1,1 milyard kubmetr (15,4 faiz azalma) Gürcüstana satılıb. Qeyd edək ki, Türkiyəyə TANAP-la bu müddətdə 2,9 milyard kubmetr (3,57 faiz artım) qaz nəql olunub.

“Azəri-Çıraq-Günəşli” və “Şahdəniz” yataqları istismara veriləndən cari il iyulun 1-dək 660,1 milyon tona yaxın neft (kondensatla birlikdə), 487,1 milyard kubmetr qaz hasil edilib ki, bu da müvafiq olaraq 3,2 faiz və 9,2 faiz artım deməkdir. “Azəri-Çıraq-Günəşli”dən 609,5 milyon ton neft, 236,5 milyard kubmetr qaz, “Şahdəniz”dən isə 50,6 milyon tona yaxın kondensat, 250,6 milyard kubmetr qaz çıxarılıb. Bundan 1 iyun 2025-ci il tarixinədək 658,1 milyon ton neft, 180,2 milyard kubmetr qaz ixraca nəql edilib.