Bu ilin yanvar-oktyabr ayları ərzində magistral neft kəmərləri ilə 30 milyon 580.7 min ton neft nəql edilib.

Azerimedia.Az xəbər verir ki, nəqletmənin 74.4 faizi Bakı-Tbilisi-Ceyhan (BTC) neft ixrac kəmərinin payına düşüb. Hesabat dövründə bu kəmər vasitəsilə 22 milyon 760.8 min ton neft ötürülüb.

BTC ilə nəql olunan neftin 85.1 faizi və ya 19 milyon 369.1 min tonu Azərbaycanda hasil edilən neft, 14.9 faizi və ya 3 milyon 391.7 min tonu isə Türkmənistan və Qazaxıstandan daxil olan neft olub.

Magistral qaz kəmərləri ilə 33 milyard 10.6 milyon kubmetr qaz nəql edilib ki, bu da 2024-cü ilin yanvar-oktyabr ayları ilə müqayisədə 0.5 faiz çoxdur. Qazın nəqlinin 58 faizi Bakı-Tbilisi-Ərzurum (Cənubi Qafqaz Boru Kəməri) vasitəsilə həyata keçirilib və bu istiqamət üzrə 19 milyard 136.9 milyon kubmetr qaz ötürülüb.

2025-ci ilin yanvar-sentyabr aylarında boru kəmərləri üzrə gəlirlər də açıqlanıb. Neft kəmərləri ilə yük daşınmasından əldə olunan gəlir 764 milyon 511.5 min manat təşkil edib. Ötən ilin eyni dövründə bu göstərici 793 milyon 319 min manat olub, faizlə ifadədə 3.6 faiz azalma qeydə alınıb.

Qaz kəmərləri ilə yükdaşımadan əldə olunan gəlir isə 2 milyard 71 milyon 837.4 min manat olub. Bu göstərici 2024-cü ilin müvafiq dövründə 1 milyard 999 milyon 5 min manat təşkil edib, faizlə ifadədə 3.6 faiz artım qeydə alınıb.

Bu ilin 9 ayında neft kəmərlərində itkilər 3.8 min ton, ötən ilin eyni dövründə isə 3.5 min ton olub. Qaz kəmərlərində itkilərin həcmi isə 34.6 milyon kubmetr, 2024-cü ildə isə 29.6 milyon kubmetr təşkil edib. Bu ilin 9 ayının göstəricilərini ötən ilin müvafiq dövrü ilə müqayisə etdikdə neft kəmərlərində itkilər 8.6 faiz, qaz kəmərlərində isə 16.9 faiz artıb.