8 NOYABR – AZƏRBAYCAN XALQININ QƏLƏBƏ ƏZMİNİN VƏ MİLLİ BİRLİYİNİN TƏNTƏNƏSİ

8 Noyabr Azərbaycan xalqının çoxəsrlik tarixində qızıl hərflərlə yazılmış, milli qürurumuzun, dövlətçilik iradəmizin və sarsılmaz birliyimizin təntənəsinə çevrilmiş möhtəşəm bir tarixdir. Bu gün sadəcə təqvimdə qeyd olunan bayram deyil. Bu gün illərlə qəlbimizdə yaşatdığımız Qarabağ həsrətinin sona çatdığı, xalqımızın öz tarixi torpaqlarına qovuşmaq arzusunun gerçəkləşdiyi, Azərbaycanın qalib dövlət kimi dünyaya öz gücünü nümayiş etdirdiyi şanlı gündür.

Zəfər Günü hər bir azərbaycanlının qəlbində xüsusi yer tutur. Çünki bu qələbənin arxasında xalqın sarsılmaz iradəsi, əsgər və zabitlərimizin misilsiz qəhrəmanlığı, şəhidlərimizin müqəddəs qanı, qazilərimizin fədakarlığı və dövlətimizin qətiyyətli siyasəti dayanır. Bu tarix bir millətin öz taleyinə sahib çıxmasının, milli birliyini nümayiş etdirməsinin və tarixi ədaləti bərpa etməsinin parlaq nümunəsidir.

Azərbaycanın Zəfər salnaməsinin əsas səhifələrindən biri 2020-ci il sentyabrın 27-də başlayan Vətən müharibəsidir. 44 gün davam edən bu müharibə xalqımızın iradəsini, ordumuzun döyüş qabiliyyətini və dövlətimizin gücünü bütün dünyaya nümayiş etdirdi. Müzəffər Azərbaycan Ordusu Ali Baş Komandan İlham Əliyevin rəhbərliyi ilə tarixi missiyanı şərəflə yerinə yetirərək torpaqlarımızı işğaldan azad etdi.
Həmin günlərdə Azərbaycan xalqı vahid amal ətrafında birləşmişdi. Cəbhədə döyüşən əsgərimizin arxasında milyonlarla insanın duası, inamı və dəstəyi dayanırdı. Ana oğlunu Vətənə əmanət edir, ata övladının qələbə xəbəri ilə qayıdacağına inanır, gənclər könüllü olaraq Vətənin müdafiəsinə hazır olduqlarını bildirirdilər. Hər bir evdə, hər bir ailədə, hər bir ürəkdə yalnız bir arzu vardı: Qarabağ azad olsun, üçrəngli bayrağımız doğma torpaqlarımızda dalğalansın!

Bu birlik Azərbaycanın ən böyük gücünə çevrildi.

Müzəffər Ali Baş Komandan cənab İlham Əliyevin qətiyyətli rəhbərliyi, siyasi iradəsi və strateji baxışı Zəfər tariximizin mühüm amillərindən oldu. Dövlət başçısının müharibə günlərində nümayiş etdirdiyi prinsipial mövqe, beynəlxalq tribunalardakı çıxışları, Azərbaycanın haqlı mövqeyini müdafiə etməsi xalqımızın inamını daha da gücləndirdi. Onun rəhbərliyi ilə Azərbaycan öz milli maraqlarını qətiyyətlə müdafiə edən, müstəqil siyasət yürüdən və tarixi hədəflərinə nail olan güclü dövlət olduğunu təsdiqlədi.

Şuşanın azad edilməsi isə Zəfər tariximizin zirvəsi oldu. Qarabağın tacı, Azərbaycan mədəniyyətinin beşiyi, milli ruhumuzun rəmzi olan Şuşanın azadlığı xalqımızın qəlbində əbədi yaşayacaq. Şuşa yalnız bir şəhər deyil, Azərbaycan xalqının mənəvi yaddaşı, milli kimliyi və tarixi qürurudur. Şuşada Azərbaycan bayrağının dalğalanması hər bir soydaşımız üçün unudulmaz sevincə çevrildi.

8 Noyabrın Zəfər Günü kimi qeyd olunması məhz bu tarixi hadisənin əhəmiyyətini bir daha təsdiqləyir. Həmin gün Azərbaycan xalqı özünün ən böyük arzularından birinə qovuşdu. İllərlə doğma yurdlarının həsrəti ilə yaşayan insanların gözlərində sevinc yaşları göründü. Ağlayan gözlər güldü, həsrət çəkən ürəklər rahatlıq tapdı, ata-baba torpaqlarına qayıdış ümidi gerçəyə çevrildi.

Bu qələbənin qiyməti isə ölçüyəgəlməzdir. Şəhidlərimizin hər biri Azərbaycanın müstəqilliyi və ərazi bütövlüyü uğrunda canından keçərək adını tarixə yazdı. Onlar bizə azad torpaqlar, başıuca xalq və qalib dövlət miras qoydular. Şəhidlərimizin xatirəsi qarşısında baş əyir, onların ailələrinə dərin ehtiramımızı bildiririk. Qazilərimizin qəhrəmanlığı isə Vətənə sədaqətin, mərdliyin və fədakarlığın canlı nümunəsidir.

Zəfər Günü həm də milli birliyimizin bayramıdır. Çünki Azərbaycan xalqı bütün siyasi, sosial və fərdi fərqliliklərdən üstün olan Vətən sevgisi ətrafında birləşərək dünyaya mühüm mesaj verdi. Biz birlikdə güclüyük, birlikdə qalibik, birlikdə Azərbaycanın gələcəyini qurmağa qadirik!

Bu gün azad edilmiş ərazilərimizdə aparılan genişmiqyaslı bərpa və quruculuq işləri Zəfərimizin davamıdır. Qarabağda və Şərqi Zəngəzurda yeni yollar çəkilir, yaşayış məntəqələri yenidən qurulur, məktəblər, xəstəxanalar və sosial obyektlər istifadəyə verilir. Böyük Qayıdış proqramı çərçivəsində keçmiş məcburi köçkünlər doğma yurdlarına qayıdır, illərlə həsrətində olduqları torpaqlarda yeni həyat qururlar.

Bir zamanlar dağıntılarla üz-üzə qalan yurd yerlərimizdə bu gün həyat yenidən canlanır. Qarabağın dağlarında, düzlərində, kənd və şəhərlərində Azərbaycan nəfəsi duyulur. Bu torpaqlarda ucalan hər yeni bina, salınan hər küçə, açılan hər məktəb Zəfərimizin əbədi nişanəsinə çevrilir.

Zəfərin qorunması və gələcək nəsillərə ötürülməsi hər birimizin vətəndaşlıq borcudur. Gənclərimiz tariximizi dərindən öyrənməli, şəhidlərimizin qəhrəmanlığını unutmamalı, dövlətçiliyimizə və milli dəyərlərimizə sahib çıxmalıdırlar. Çünki güclü Azərbaycan yalnız hərbi qüdrəti ilə deyil, savadlı, vətənpərvər, milli ruhlu və məsuliyyətli vətəndaşları ilə də seçilməlidir.

Ulu Öndər Heydər Əliyevin müəyyən etdiyi dövlətçilik strategiyası müasir Azərbaycanın inkişafında mühüm tarixi əhəmiyyət daşıyır. Bu siyasi irsin davam etdirilməsi, cənab Prezident İlham Əliyevin rəhbərliyi ilə ölkəmizin suverenliyinin möhkəmləndirilməsi və beynəlxalq mövqelərinin gücləndirilməsi Azərbaycanın gələcək inkişafı üçün mühüm əsasdır.

Bu gün Azərbaycan qalib xalq, güclü dövlət və öz taleyinə sahib çıxan millət kimi tarix səhnəsində öz layiqli yerini tutur. 8 Noyabr bizə bir daha sübut edir ki, milli birlik, qətiyyət, Vətən sevgisi və dövlətçilik iradəsi qarşısında heç bir çətinlik əbədi dayana bilməz.

Zəfərimizin müəllifləri sırasında ilk növbədə canlarını Vətənə fəda edən şəhidlərimiz, sağlamlıqlarını itirən qazilərimiz, döyüş meydanında qəhrəmanlıq göstərən əsgər və zabitlərimiz, xalqımızın birliyi və dövlətimizin rəhbərliyi dayanır. Bu qələbə Azərbaycan tarixinin ən müqəddəs səhifələrindən biri kimi gələcək nəsillərə örnək olacaq.

Əziz həmvətənlər!

Sizi 8 Noyabr – Zəfər Günü münasibətilə ürəkdən təbrik edir, hər bir ailəyə möhkəm cansağlığı, firavanlıq, ruzi-bərəkət və xoşbəxtlik arzulayıram. Qoy üçrəngli bayrağımız daim ucalarda dalğalansın, müstəqil Azərbaycanımızın suverenliyi əbədi olsun!

Müzəffər Ali Baş Komandan, Azərbaycan Respublikasının Prezidenti cənab İlham Əliyevə xalqımızın tarixi Zəfərinə aparan yolda nümayiş etdirdiyi qətiyyətli rəhbərliyə görə ehtiramımızı bildirir, dövlətimizin daha böyük uğurlara imza atmasını arzulayırıq.

Şəhidlərimizin əziz xatirəsini dərin hörmət və ehtiramla yad edir, qazilərimizə şəfa, şəhid ailələrinə səbir və güc diləyirik.

8 Noyabr – Zəfər Günümüz mübarək!

Yaşasın müstəqil Azərbaycan! Yaşasın qalib Azərbaycan xalqı! Yaşasın Azərbaycan Ordusu!

Qarabağ Azərbaycandır!