Azərbaycan xalqının 44 günlük Vətən müharibəsində qazandığı möhtəşəm qələbə, uzun illər Ermənistanın işğalı altında qalan tarixi torpaqlarımızın azad edilməsi, ölkəmizin ərazi bütövlüyünün və tarixi ədalətin bərpası xalqımızın çoxəsrlik dövlətçilik tarixinin ən şərəfli səhifələrindən biridir.

Müasir texnologiyalara və son nəsil silahlara malik olan Azərbaycan Ordusu əzəli torpaqlarımızı işğaldan azad etmək uğrunda beynəlxalq hüquq çərçivəsində legitim döyüşlər apardı və böyük Zəfərimizi xalqımızın tarixinə həkk etdi.

Azərbaycan 2020-ci il sentyabrın 27-də başlanan İkinci Qarabağ müharibəsini hərbi-siyasi yolla 44 gün ərzində qələbə ilə başa çatdırdı. Döyüş əməliyyatları nəticəsində Müzəffər Azərbaycan Ordusu tərəfindən 300-dən çox yaşayış məntəqəsi, həmçinin Ağdərə, Murovdağ və Zəngilan istiqamətlərində mühüm strateji yüksəkliklər işğaldan azad edildi.

Azərbaycan xalqının əzmi və iradəsi, ölkənin iqtisadi gücü, müasir ordu quruculuğu, xalq-iqtidar birliyi bu tarixi qələbəni təmin edən əsas amillər oldu. Dövlətimizin nüfuzunu daha da artıran, milli qürurumuzun təntənəsinə çevrilən bu misilsiz qələbənin əbədiləşdirilməsi məqsədilə Prezident, Müzəffər Ali Baş Komandan cənab İlham Əliyevin Sərəncamı ilə hər il 8 Noyabr Azərbaycan Respublikasında Zəfər Günü kimi təntənəli şəkildə qeyd olunur.

44 günlük Vətən müharibəsi Ali Baş Komandanın rəhbərliyi və Azərbaycan Ordusunun qəhrəmanlığı sayəsində xalqımızın möhtəşəm zəfəri ilə başa çatdı. Bu haqq savaşı Azərbaycan tarixinə qızıl hərflərlə əbədi yazıldı. Qələbə Ali Baş Komandanın qətiyyəti və siyasi iradəsi, Müzəffər Ordumuzun şücaəti, qəhrəman və cəsur əsgərlərimizin igidliyi, müqəddəs şəhidlərimizin qanı, eləcə də xalqımızın sarsılmaz birliyi hesabına qazanıldı.

Otuz illik münaqişəyə cəmi 44 gün ərzində son qoyan bu müharibə dünya hərb tarixinə misli görünməmiş zəfər nümunəsi kimi düşdü. Azərbaycan Ordusunun gücünü, Azərbaycan xalqının qüdrətini bütün dünyaya nümayiş etdirdi. Buna görə də 44 günlük qəhrəmanlıq savaşımız tarix boyu xalqımızın şanlı qürur mənbəyi olaraq qalacaq.

Qarabağ bizimdir! Qarabağ Azərbaycandır!