2025-ci ilin dövlət büdcəsində sosial müdafiə və sosial təminat xərclərinə 4 milyard 641.1 milyon manat məbləğində vəsait ayrılması nəzərdə tutulsa da, aidiyyəti sifarişçi təşkilatların kart sifarişlərinə uyğun olaraq 4 milyard 554.2 milyon manat məbləğində vəsait istifadə olunub ki, bu da 2024-cü illə müqayisədə 403.1 milyon manat və ya 9.7 faiz çoxdur.

Azerimedia.Az-ın məlumatına görə, sözügedən məsələ "Azərbaycan Respublikasının 2025-ci il dövlət büdcəsinin icrası haqqında" Qanun layihəsində əksini tapıb.

Funksional təsnifata uyğun olaraq 2025-ci ildə sosial müdafiə və sosial təminat xərcləri üzrə istifadə olunmuş vəsaitin 4 milyard 42.1 milyon manatı və ya 88.8 faizi sosial müdafiə və sosial təminat sahələri üzrə digər müəssisə və tədbirlərə (Azərbaycan Respublikası Əmək və Əhalinin Sosial Müdafiəsi Nazirliyinin xətti ilə ayrı-ayrı kateqoriyadan olan şəxslərə ödənilən Azərbaycan Respublikası Prezidentinin təqaüdləri və sosial müavinətlər, dövlət sosial müdafiə fondunun büdcəsinin balanslaşdırılması məqsədilə dövlət büdcəsinin öhdəliklərinin maliyyələşdirilməsi üçün ayrılmış vəsait, məcburi köçkünlərə və onlara bərabər tutulan şəxslərə ödənişlər, haqqı ödənilər ictimai işlərin təşkili xərcləri və göstərilən xidmətlərə görə publik hüquqi şəxslərə dövlət büdcəsindən ayırmalar), 512.1 milyon manatı və ya 11.2 faizi sosial müdafiə (ünvanlı dövlət sosial yardımı, dövlət qulluqçularına verilən müavinət, dəfn üçün müavinət, uşağın anadan olmasına görə müavinət, şəhid olanların uşaqlarına verilən müavinət və sair sosial müavinətlər) və sosial təminat (Azərbaycan Respublikası Elm və Təhsil Nazirliyinin və Azərbaycan Respublikası Əmək uşaq evlərinin saxlanılması xərcləri) xərclərinə sərf edilib.