“Əslində kraudfandinqin mahiyyəti çox sadədir. Təsəvvür edin ki, gənc bir mühəndis yeni texnologiya hazırlayıb, bir fermer istehsalını genişləndirmək istəyir və yeni məhsulunu bazara çıxarmağa hazırlaşır. Onların yaxşı ideyası var, amma bankın tələb etdiyi girovu yoxdur, ənənəvi maliyyə mənbələrinə çıxışı məhduddur”.
Azerimedia.az xəbər verir ki, bunu Milli Məclisin İnsan hüquqları komitəsinin sədri Zahid Oruc iyulun 7-də parlamentdə “Kraudfandinq haqqında” qanun layihəsinin müzakirəsi zamanı deyib.

O bildirib ki, kraudfandinq belə layihələrə minlərlə insanın kiçik məbləğlərlə qoşulmasına imkan yaradır: “Bir nəfərin gerçəkləşdirə bilmədiyi layihəni yüzlərlə, hətta minlərlə insan birlikdə maliyyələşdirir. Məhz buna görə dünyanın aparıcı iqtisadiyyatları kraudfandinqi innovasiyanın, sahibkarlığın və iqtisadi fəallığın mühüm maliyyə alətlərindən birinə çeviriblər”.
Komitə sədrinin fikrincə, Azərbaycan son illərdə iqtisadiyyatın şaxələndirilməsi, qeyri-neft sektorunun inkişafı, kiçik və orta sahibkarlığın gücləndirilməsinə çalışır:

“Belə bir şəraitdə “Kraudfandinq haqqında” ayrıca qanunun qəbul edilməsi tamamilə zəruri addımdır. Son 15-20 ildə dünya maliyyə bazarlarında baş verən ən mühüm yeniliklərdən biri məhz kraudfandinqin meydana çıxmasıdır. Əgər əvvəllər yeni biznes qurmaq istəyən insanın yalnız iki yolu var idisə – ya banka müraciət etmək, ya da imkanlı investor tapmaq – lakin indi üçüncü maliyyələşmə modeli formalaşıb. Minlərlə insan kiçik məbləğlərlə müxtəlif layihələrin investoruna çevrilə bilir. Beləliklə, kapital yalnız iri maliyyə institutlarının əlində cəmləşmir. İstedadlı insanın ideyası ilə cəmiyyətin sərbəst vəsaiti arasında yeni maliyyə körpüsü yaranır”.

O əlavə edib ki, yeni qanun layihəsi səhm və borc əsaslı kraudfandinqin hüquqi əsaslarını müəyyən edir, platforma operatorlarının fəaliyyətini tənzimləyir, investorların hüquqlarını qoruyur:

“Yeni qanunun əsas məqsədi budur: yaxşı ideya maliyyə çatışmazlığı ucbatından yarımçıq qalmamalıdır”.