Azərbaycanın bəzi rayonlarında min hektarlarla əkinəyararlı torpaq sahələri, örüş yerləri hasarlanıb və illərdir toxunulmaz ərazilər kimi imkanlı şəxslərin, o cümlədən məmurların mülkiyyətində saxlanılır. Hətta dövlət başçısı da zamanında əkinəyararlı torpaqların imkanlı şəxslər tərəfindən zəbt edilməsinə diqqət çəkmişdi.

Ölkə rəhbəri hələ 2016-cı ildə Sabirabadda keçirilmiş müşavirədə bu barədə daha sərt danışmışdı: “Bəzi torpaqlar müxtəlif adamlar tərəfindən qanunsuz olaraq zəbt edilib və o torpaqlarda heç bir fəaliyyət göstərilmir. O torpaqların icarə müqavilələri ləğv edilməlidir... Bir qarış torpaq belə boş qalmamalıdır”.

Müşahidələr göstərir ki, bu sahədə vəziyyət problemli olaraq qalmaqdadır. Bəzi rayonlarda hasarlanmış istifadəyə yararlı torpaqlar imkanlı şəxslərin “işğalı”ndan qurtarılmayıb.

Onlar vaxtilə hansısa yollarla bələdiyyə və dövlət torpaqlarını hasarlayıblar, bəzi hallarda müxtəlif bəhanələrlə xüsusi mülkiyyətdə olan pay torpaqlarını da kəndlilərin əlindən alıblar.

Milli Məclisin Aqrar siyasət komitəsinin sədri Tahir Rzayev gündəmdə olan mövzu ilə bağlı Modern.az-a açıqlamasında deyib ki, zəbt olunmuş torpaq sahələri istifadəsiz saxlanıla bilməz:

“Sözsüz ki, bu, qanunsuz addımdır. Bəzi örüş yerləri qanunsuz olaraq əkilir. Müəyyən adamlar tərəfindən zəbt olunub. Bəzi adamlar ehtiyac ucbatından, şəhərə gəldiklərinə görə pay torpaqlarını satırlar. Müəyyən adamlar bu torpaqları alır, onları çəpərləyərək “bura mənimdir” deyirlər. “Bura mənim atamdan qalıb, sovet vaxtı burada olmuşam” kimi sözlərin də heç bir əsası yoxdur. Torpaqlardan istifadə olunmalıdır. Qanunda da qeyd olunub ki, torpağı icarəyə götürəndən sonra üç il əkib-becərmirsənsə, səndən alınıb başqasına verilməlidir.

Eləcə də istifadəsiz qalan torpaqları alanlar da əkin işləri görməlidirlər. Adam var ki, heyvan saxlayır, ancaq torpağını satıb, yeri yoxdur ki, onu otarsın. Qonşu icazə vermir ki, boş ərazidə həmin mal-qara otlasın. Nə olsun ki, yer sənindir? Torpaq boş qalınca bu adama ucuza ver, mal-qarası otlasın, oranı da abadlaşdırsın. Torpaq əkilib-becərilməyəndə ölür. Ona görə hər bir qarış torpaqdan istifadə edilməlidir.

Ayrı-ayrı yerlərdə zəbt olunmalar çoxdur. Dövlətin tapşırıqları var, torpaqlar müəyyən adamların əlindən alınıb, yenə də alınmalara ehtiyac var. Bu məsələdə ciddi tədbirlər görülməlidir”.