"Torpaqların kateqoriya dəyişdirilməsi ilə bağlı Əmlak Məsələləri Dövlət Xidmətinə ediləcək müraciətlərə baxılması prosesi "vahid pəncərə" prinsipi əsasında elektron qaydada həyata keçiriləcək".

Bu sözləri Torpaq Məcəlləsinə edilmiş dəyişiklərə dair brifinqdə İqtisadiyyat Nazirliyi yanında Əmlak Məsələləri Dövlət Xidmətinin şöbə müdiri İlqar Nəbiyev deyib.

O qeyd edib ki, dövlət orqanları tərəfindən torpaq sahəsinin kateqoriyasının dəyişdirilməsi ilə bağlı müraciətlərə rəy verilməsi prosesi Elektron Hökumət İnformasiya Sistemi vasitəsilə həyata keçiriləcək:

"Dövlət qurumları 10 iş günü müddətində rəylərini elektron qaydada bildirməlidirlər. Göstərilən müddətdə rəylər təqdim edilmədikdə, torpaq sahəsinin kateqoriyasının dəyişdirilməsi aidiyyəti dövlət orqanı ilə razılaşdırılmış hesab olunacaq".

İ.Nəbiyev bildirib ki, torpaqların kateqoriyasının dəyişdirilməsi üçün müraciət edən şəxs öz müraciətinin statusunu elektron qaydada izləyə biləcək:

"Əgər vətəndaş müraciətinə imtina alıbsa, bu imtinanın əsaslandırılmasını göstəriləcək və vətəndaş görə biləcək nə üçün müraciətinə imtina alıb. Vətəndaş bu imtinanın səbəbini gördükdən sonra o səbəbi aradan qaldıraraq yenidən müraciət edə bilər".

Onun sözlərinə görə, kateqoriya dəyişməsi ilə bağlı heç bir rüsum tələb olunmur.