Pakistanın Azərbaycandakı səfirliyində "Kəşmir Həmrəylik Günü"nə həsr olunan tədbir keçirilib.

Tədbirdə Pakistanın Azərbaycandakı səfiri Qasım Mohiuddin, səfirliyin digər əməkdaşları və media nümayəndələri iştirak ediblər.

Tədbirdə çıxış edən səfir bildirib ki, bu günün əhəmiyyəti beynəlxalq birliyin Cammu və Kəşmir xalqının öz müqəddəratını təyinetmə hüququna olan haqlı mübarizəsində dəyişməz dəstəyini təsdiq etməsindən ibarətdir:

"Hindistanın qanunsuz işğal etdiyi Cammu və Kəşmir (IIOJK - Hindistan işğalı altında olan Cammu və Kəşmir) beynəlxalq aləmdə mübahisəli məsələ kimi tanınır və onun həlli BMT Təhlükəsizlik Şurasının bir neçə qətnaməsində öz əksini tapıb: IIOJK-də insan hüquqları ilə bağlı durum Hindistanın 5 avqust 2019-cu ildə etdiyi qanunsuz və təktərəfli addımlardan sonra daha da pisləşib. Hindistanın işğalçı qüvvələri hələ də Kəşmirin mülki əhalisinə, o cümlədən kişilərə, qadınlara, uşaqlara və yaşlılara qarşı amansız güc tətbiq etməyə davam edirlər. Kəşmir gənclərinin qanunsuz həbsi, kəşmirli qadınlara qarşı təcavüzlər və davam edən qətllər dünya miqyasında ciddi narahatlıq doğurur. Bu cür insanlıq əleyhinə olan cinayətlərə Hindistanın dövlət səviyyəsində dəstək verməsi təəssüf doğurur.

Hindistanın bu addımı Cammu və Kəşmirin müsəlman əhalisini öz doğma torpaqlarında etnik azlıq vəziyyətinə salmağa yönəlib. Bu baxımdan Cammu və Kəşmir xalqına edilən işgəncələr mövcud Hindistan hökumətinin dini azlıqlara, xüsusən də müsəlmanlara qarşı ekstremist ideologiyasını əks etdirir. Beynəlxalq aləm BMT-nin himayəsi altında Kəşmir xalqının öz müqəddəratını təyinetmə hüququna və Hindistanın kəşmirlilərin arzularına uyğun olaraq sərbəst və ədalətli bir referendum keçirməsinə imkan verənə qədər Kəşmir xalqının haqlı mübarizəsinə dəstəyi davam etdirmək vacibdir".

"Hindistanın işğal etdiyi Cammu və Kəşmirdə yaşayan insanların çəkdiyi əzab Azərbaycan xalqının Ermənistanın Qarabağı işğal etdiyi dövrdə yaşadıqlarına bənzəyir. Pakistan hökuməti və Kəşmir xalqı, Cammu və Kəşmir məsələsində ədalətli və davamlı dəstəyinə görə qardaş Azərbaycan xalqına və hökumətinə təşəkkürünü bildirir", - deyə səfir çıxışını yekunlaşdırıb.