Yanvarın 8-də Lerik Rayon İcra Hakimiyyətinin başçısı Əkbər Abbasov Piran kənd inzibati ərazi dairəsi üzrə nümayəndəliyinin Piran və Zərigüməco kəndlərinin sakinləri ilə görüş keçirib. Qəbulda Piran kənd inzibati ərazi dairəsi üzrə nümayəndəliyinin Piran və Zərigüməco kəndlərinin sakinləri iştirak ediblər. Lakin fotolarda sakinlərin oturduğu hissədə deyil, yalnız rayon rəhbərliyinin oturduğu masanın yanında istilik sobalarının qoyulması diqqət çəkib.

Sual yaranıb ki, icra başçısının keçirdiyi görüş zalında niyə istilik sistemi yoxdur və yalnız onun oturduğu masanın arxasına elektrik qızdırıcıları qoyulub?

Məsələ ilə bağlı Lerik RİH-lə əlaqə saxladıq. Qurumun Sosial-iqtisadi inkişafın təhlili və proqnozlaşdırılması şöbəsinin müdiri, icra başçısının müavini Habil Məlikov bildirib ki, elektrik qızdırıcıları sakinlərin əyləşdiyi hissədə də olub, sadəcə, fotolarda görünmür:

"Çünki iclas zalında dörd ədəd elektrik yuvası var. İkisi öndə, ikisi isə ən arxa hissədədir. Təbii ki, qəbulda iştirak edən insanlar istilik olmadan orada otura bilməzlər axı".

Qurum rəsmisi əlavə edib ki, görüşün keçirildiyi zal Piran kənd Mədəniyyət klubuna məxsusdur:

"Orada ancaq tədbirdən-tədbirə eynilə bu formada elektrik qızdırıcılarından istifadə edirik. Çünki başqa istilik sistemi yoxdur. İşçilərin də öz otaqları, otaqlarda odun sobaları var. Düzdür, kəndə qaz xətti çəkilsə də, Mədəniyyət klubuna çəkilməyib deyə bu istilik sistemlərindən istifadə edilir".