Hava şəraitinin qeyri-sabit keçməsi bütün regionlarda elektrik təsərrüfatında lokal xarakterli qəza hallarının yaranmasına səbəb olub.

Bu barədə "Azərişıq" Açıq Səhmdar Cəmiyyətindən məlumat verilib.

Bildirib ki, "Azərişıq" ASC ölkə ərazisində güclü külək və yağışın yaratdığı qəzaları aradan qaldırmaq üçün fasiləsiz çalışır:

"Ölkə ərazisində 15 aprel tarixindən başlayan kəskin hava şəraiti, demək olar ki, bütün regionlarda elektrik təsərrüfatında lokal xarakterli qəza hallarının yaranmasına səbəb olub. Leysan xarakterli intensiv yağış və güclü külək nəticəsində aşan ağac və kənar əşyaların elektrik xətlərini zədələməsi bəzi ərazilərdə elektrik enerjisinin verilişində məhdudiyyətlərin yaranmasına səbəb olub.

Elektrik enerjisi kəsintisi və qəza hallarının qarşısının alınması üçün "Azərişıq" ASC paytaxt və bölgələrdə gücləndirilmiş iş rejimində fəaliyyətini davam etdirir. ASC bütün qabaqlayıcı texniki və təşkilatı tədbirləri həyata keçirib. Həmçinin qurumun qəza xidmətinin əməkdaşları da ərazilərdə fəsadların aradan qaldırılması istiqamətində 24 saat fasiləsiz işi davam etdirirlər.

Bəzi hallarda isə yağışla müşayiət olunan külək və sel suları elektrik təsərrüfatına daha böyük həcmdə ziyan vurmasın deyə qabaqlayıcı tədbir kimi xətlərə enerjinin ötürülməsində planlı fasilə verilir".

"İstehlakçılardan xahiş edirik ki, yarana biləcək hər hansı bir çətinlik zamanı "Azərişıq" ASC-nin "199" Çağrı Mərkəzinə və rəsmi "Facebook", "Instagram" səhifələrimizə müraciət etsinlər. 24 saat fəaliyyət göstərən "199" Çağrı Mərkəzinə daxil olmuş təklif və şikayətlər dərhal icraya yönəldilir", - deyə qurumdan əlavə edilib.