Ağdaş rayonunun Qəribli kəndində yerləşən və illərdir həllini tapmayan zibillik poliqonu yerli sakinləri təngə gətirib.

Zibillik ərazinin həcmi o qədər böyükdür ki, ərazidən yayılan dözülməz qoxu və zibil bütün kəndi bürüyür.

Təbii ki, həllini tapmayan antisanitar vəziyyətin davam etməsi yerli əhalinin təşvişini günbəgün daha da artırır və insanlar artıq infeksiyalara - viruslara, yoluxucu xəstəliklərə düçar olacaqlarından qorxurlar. Bu da səbəbsiz deyil, çünki ərazi sözün əsl mənasında xəstəlik mənbəyidir və sağlamlıq üçün təhlükə yaradır. Üstəlik, nəzərə alsaq ki, qarşıdan yay fəsli gəlir, vəziyyətin hansı həddə çatacağını təsəvvür etmək elə də çətin deyil.

Təsəvvür edin, bir kəndin ərazisinə daxil olursan, çox keçməmiş səni təmiz hava, yaşıllıq ərazilər, quşların həzin nəğməsi əvəzinə, zibil qoxusu, leş-cəmdək, saysız-hesabsız tullantı və qara qarğaların, itlərin, müxtəlif heyvanların vahiməli səs-küyü qarşılayır. Üstəlik, ərazidə müxtəlif növ zərərli həşəratların hücumuna məruz qalmamaq mümkün deyil. Kənddə olduğumuz müddətdə bu dözülməz vəziyyətdən əziyyət çəkməyimiz, yerli əhalinin hər gün hansı çətinliklərlə qarşılaşdığını deməyə əsas verir və heç kimdə şübhə doğurmur. Lakin əfsuslar olsun ki, yaşayış məntəqəsində ekologiya və ətraf mühitin korlanmasının özünün ən yüksək həddinə qədəm qoymasına baxmayaraq, problem aradan qaldırılmaq əvəzinə, hər keçən gün daha da artır.

Videoya baxmaq üçün linkə daxil olun

Sakinlərin sözlərinə görə, zibillik poliqonunda yayılan üfunətlə yanaşı, quduzlaşmış itlər, sürünən heyvanlar və virus daşıyıcısı olan quşlar yuva salıb:

"Həmin heyvanlar, xüsusən də quşlar yoluxduqları virusu kənd əhalisi daxil olmaqla, istənilən əraziyə yaya bilərlər. Ən pisi isə zibil qoxusundan nəfəs ala bilməməyimizdir. Sonra həmin zibilləri yandıranda, bu dəfə tüstüsü bizi birtəhər edir. Bir az külək əsən kimi isə zibillər havada uçuşur, həyət-bacaya qədər gəlib dolur", - deyə sakinlər fəryad edirlər.

Onu da qeyd edək ki, kənd camaatı dəfələrlə aidiyyəti qurumlara müraciət etsələr də, onların şikayətlərinə baxan olmayıb. Ona görə də mövcud acınacaqlı vəziyyət hələ də aktuallığını qoruyub saxlayır.