"Gənclik Mall"un parklanma yerinin giriş hissəsində "drop-off" məntəqəsi (mindirib-düşürmə yeri -red.) yaradılıb və geriyədönmə yeri təkmilləşdirilib.

Bu barədə Azərbaycan Yerüstü Nəqliyyat Agentliyinin (AYNA) mətbuat katibi Tural Orucov deyib.



Sözçü qeyd edib ki, Fətəli xan Xoyski küçəsi, "Gənclik Mall"un qarşısı sıxlıq hallarının müşahidə edildiyi ərazi olduğu üçün bu layihə icra edilib:

"Əhmədbəy Ağaoğlu küçəsi, Vaqif və Atatürk prospektləri istiqamətlərindən gələn 6 hərəkət zolağı bu ərazidə 3 hərəkət zolağı ilə əvəzləndiyi üçün darboğaz əmələ gəlirdi və nəqliyyat vasitələrinin hərəkəti çətinləşirdi.

Bundan əlavə, "Gənclik Mall"a gələn yüksək ziyarətçi axını parklanma yerinin girişində növbəyə səbəb olduğunu qeyd etməliyik. Bu isə Fətəli xan Xoyski küçəsini, o cümlədən, avtobus zolağını bloklayır.

Yeni layihədən sonra "Gənclik Mall"un parklanma yerinin giriş hissəsində "drop-off" məntəqəsi yaradılıb və geriyədönmə yeri təkmilləşdirilib. Fətəli xan Xoyski küçəsindəki zolaqlar silinərək yenidən çəkilib və 3 hərəkət zolağı 4 hərəkət zolağı ilə əvəzlənib".



O əlavə edib ki, bu addım nəticəsində ticarət və əyləncə mərkəzinin giriş hissəsində sıxlıq azaldılacaq:

"Sıxlıq olsa belə, bunun əsas yola minimum təsiri müşahidə ediləcək, ictimai nəqliyyatın fasiləsiz hərəkətinin təmin edilməsi baş tutacaq.

Bütün tənzimləmələr AYNA-nın mütəxəssisləri tərəfindən hesablanıb və təhlil olunub, vətəndaşların daha rahat hərəkət etməsi üçün nəzərdə tutulub".