Yekaterinburqdakı 1 saylı istintaq təcridxanasında təkadamlıq kameraya salınan Sverdlovsk vilayətindəki Azərbaycan diasporunun rəhbəri Şahin Şıxlinski qohumlarından bağlama ala bilər. Onun gündəlik rejimi kiçik kamerada olmasına baxmayaraq, digər məhbuslardan heç nə ilə fərqlənmir.

Azerimedia.Az-ın xəbərinə görə, Ura.ru nəşri Şıxlinskinin hansı şəraitdə həbsdə saxlanması barədə məlumat verib.

"1 saylı istintaq təcridxanasında bir neçə xüsusi post var: 17, 21, 25 və s. Bu, təxminən on təkadamlıq kameradan ibarət dəhlizdir. Hər bir kamera, yəqin ki, altı metrdir. Orada çarpayı, unitaz, kiçik stol və rəf var. Kiçik pəncərəsi var", - deyə Ura.ru-nun təhlükəsizlik mühitindəki mənbəsi təsvir edib.

Onun sözlərinə görə, təkadamlıq kameraya salınan məhbuslar da gəzintiyə çıxarılır.

"Oyanmaq vaxtı səhər 6-dadır, idman, səhər yeməyi və hər şey müəyyən olunmuş qrafikə uyğun həyata keçirilir. Qeyd etmək istərdim ki, belə məhbuslar daha ciddi nəzarət altındadırlar", - deyə mənbə əlavə edib.

Hüquqşünas və "Hüquqi əsas" assosiasiyasının rəhbəri Aleksey Sokolov qeyd edib ki, Şıxlinskini onun öz təhlükəsizliyi üçün təkadamlıq kameraya salmış ola bilərlər.

"Belə kameralara başqa insanlar tərəfindən təhlükə ola biləcək şəxsləri salırlar. Çox güman ki, onu başqa məhbuslardan qoruyurlar. O, qohumlarından bağlamalar ala bilər. Kitablar da ala bilər", - deyə təkadamlıq kamerada altı ay keçirmiş Sokolov bildirib.

Təhlükəsizlik güclərindəki üçüncü mənbə əlavə edib ki, həmçinin kriminal avtoritetlər, "terrorçuluq" maddələri ilə saxlanılan şəxslər və ya məmurlar da "təkadamlıq"lara düşür.

"Əgər şəxs istintaq təcridxanasında qrafikə əməl etmirsə, o da təkadamlıq kameraya və ya daha sərt şərtlərin olduğu karserə düşə bilər", - deyə agentliyin mənbəsi vurğulayıb.