Ölkədə heyvanlar arasında virus və infeksiya xəstəlikləri yayılıb. Əsasən dabaq xəstəliyinə yoluxma sayında artım müşahidə edilir.

Oxu.Az xəbər verir ki, Azərbaycan Qida Təhlükəsizliyi Agentliyi bununla bağlı heyvan satışı bazarlarında monitorinqlərə başlayıb. Monitorinqlər zamanı məlum olub ki, heyvan satış bazarlarında təhlükəsizlik tədbirləri görülməyib, dezinfeksiya işləri aparılmayıb. Bu da heyvanların yoluxmasına şərait yaradır. Bu məqsədlə AQTA oktyabrın 25-dən etibarən heyvan satışı bazarlarının fəaliyyətini dayandıracaq.

Məsələ ilə bağlı Bakıdakı heyvan satış bazarına baş çəkdik. Bakının Sabunçu rayonu, Kürdəxanı qəsəbəsi ərazisində fəaliyyət göstərən, Bakının ən böyük mal-qara satışı bazarlarından olan obyektdə müşahidə apardıq. Müşahidə zamanı məlum oldu ki, həqiqətən də bazarda heyvanların virusa yoluxmadan qorunması üçün heç bir tədbir görülməyib. Bazarda heyvanlar arasında arakəsmələr quraşdırılmayıb, ayrı-ayrı təsərrüfatlardan gətirilən mal-qara eyni yerə toplanır.

Bununla yanaşı, bazarda natəmizlik də hökm sürür.

Bazarda müşahidələrimiz zamanı ona yaxın dabaq xəstəliyinə yoluxmuş, ağzıköpüklü heyvanın satışa çıxarıldığının şahidi olduq.



Müşahidələrimiz zamanı alıcı və satıcılar da hadisədən narahat olduqlarını dedilər. Satıcılar bildirdilər ki, artıq iki aydan çoxdur ki, ölkə ərazisində heyvanlar arasında bu xəstəlik sürətlə yayılır. Nəticədə təsərrüfatlara ciddi ziyan dəyir, bazarlarda alıcılıq qabiliyyəti azalır.

Satıcılar bildirirlər ki, xəstəliyin qarşısını almaq üçün istifadə etdikləri dərman preparatları da olduqca keyfiyyətsizdir:

"Əvvəllər heyvan dabaq xəstəliyinə yoluxurdu, müalicə edirdik, bir həftəyə sağalırdı. İndi xəstəliyə yoluxan heyvanları nə qədər müalicə edirik, sağalmır. Avqust ayından bu xəstəlik sürətlə yayılır. Nə dərmanın təsiri var, nə də müalicənin. Əvvəllər "Penbeks", "Butalex" dərmanları var idi, onunla müalicə edirdik, sağalırdı. İndi o keyfiyyətdə dərmanlardan heç biri yoxdur. Apteklərdə bir dənə keyfiyyətli dərman, vitamin yoxdur".

Satıcılar aidiyyəti dövlət qurumundan da şikayətçidir: "Neçə aydır heyvanlar arasında xəstəlik yayılıb. Kənd Təsərrüfatı Nazirliyindən heç kim bazara gəlib maraqlanmır, təsərrüfatlara baş çəkmir. Dövlət dərmanlar və müalicə üçün, dezinfeksiya tədbirlərinə vəsaitlər ayırır. Amma nazirlik işçilərindən heç kim nə bazara gəlir, nə də fermerlərlə maraqlanır. Nə dərman, nə də baytar var! Azərbaycanı gəzsən, barmaqla sayılacaq qədər sovet dönəmindən qalmış yaşlı baytar var. Bir nəfər də olsun gənc kadr yoxdur".

Satıcılar xəstəliyin qarşısının alınması üçün bazarların bağlanması tədbirini qənaətbəxş adlandırırlar:

"Bir müddət bağlansın, hərə öz malını həyətində müalicə edib sağaltsın. Əks təqdirdə bunun qarşısını almaq mümkün olmayacaq".