44 günlük Qarabağ Müharibəsindən sonrakı dövrdə həm İran, həm də Ermənistan siyasətçiləri və ekspertləri tərəfindən mütəmadi olaraq gündəmə gətirilən məsələ bu günlərdə reallaşıb: İran Müdafiə naziri general Əziz Nəsirzadənin 20-21 may tarixlərində İrəvana rəsmi səfəri zamanı iki ölkə arasında hərbi əməkdaşlığa dair Anlaşma Memorandumu imzalanıb.

Bu barədə "Azad İran" "YouTube" kanalında yayımlanan videosüjetdə qeyd olunub.

Bildirilir ki, bununla İranın Ermənistana son illər ərzində hər vəchlə gizlətməyə çalışdığı hərbi dəstəyi açıq müstəviyə keçib və İran rəsmən Ermənistanı silahlandıran Fransa-Hindistan-Yunanıstan üçlüyünə qoşulub.

"Ən maraqlısı budur ki, Tehranla İrəvan arasında hərbi anlaşma Azərbaycan və İran hərbçilərinin erməni işğalından azad edilmiş Qarabağ ərazisində "Araz-2025" adlı birgə hərbi təlimlərinin keçirildiyi günlərdə əldə olunub. Bu da İran hakimiyyətinin Cənubi Qafqazda illərdən bəri yürütdüyü Ermənistan ağırlıqlı ikibaşlı və ikiüzlü siyasətindən əl çəkmədiyini göstərir.

Son illər İranın Ermənistana müxtəlif növ silahlar, o cümlədən tank əleyhinə raketlər və müxtəlif dronlar verdiyi barədə xəbərlər yayılıb, həmçinin ötən il İranla Ermənistan arasında 500 milyon dollarlıq gizli silah müqaviləsi imzalandığı barədə məlumat üzə çıxıb. İran rəsmiləri 44 günlük müharibədən sonra Tehranın davranışı kontekstində məntiqi və inandırıcı görünən bu xəbərləri təkzib edib. Amma İrəvana səfərinin başlanğıcında İranın müdafiə naziri deyib: "Hərbi sahədə İran-Ermənistan əlaqələrinin səviyyəsi çox yaxşıdır".

Əgər ortada real hərbi əməkdaşlıq, o cümlədən Ermənistana silah tədarükü yoxdursa, onda nazir bu sahədə əlaqələrin çox yaxşı olduğunu niyə bəyan etsin ki?!"

Ətraflı süjetdə: