ABŞ-nin Nyu-York ştatında yetkinlik yaşına çatmayan istifadəçiləri süni intellekt çatbotlarının yarada biləcəyi risklərdən qorumaq məqsədilə yeni qanun qüvvəyə minib.
Azerimedia.az xarici KİV-ə istinadla xəbər verir ki, ştatın qubernatoru Keti Hokulun imzaladığı yeni qanuna əsasən, 18 yaşdan kiçik istifadəçilərə süni intellekt çatbotlarında insanı təqlid edən, emosional asılılıq yaradan, özünə zərər verməyə təşviq edən və ya seksual məzmunlu söhbətlər aparan funksiyaların təqdim edilməsi qadağan olunur.

Qubernatorluğun ofisindən verilən açıqlamada bildirilib ki, yeni qanun tələblərini pozan şirkətlər barəsində ştatın baş prokuroru tərəfindən 25 min dollara qədər inzibati cərimə tətbiq edilməsi tələb oluna bilər.

Qanun həmçinin Nyu-York sakinlərinin mümkün pozuntularla bağlı çatbot şirkətlərindən şikayət edə bilmələri üçün açıq internet saytının yaradılmasını nəzərdə tutur.