Ötən il kartdan-karta köçürmə dövriyyəsi 66 milyard manat olub.
Azerimedia.az-ın xəbərinə görə, bunu Azərbaycan Mərkəzi Bankının sədri Taleh Kazımov kartdan-karta əməliyyatlarına tətbiq olunan günlük limitlərdən danışarkən deyib.

O bildirib ki, bu, normal bir dövriyyə deyil:

“Cari ilin avqust ayı üzrə məlumatlarda dövriyyə 48 milyard manatdır. Bu, birbaşa bankların problemi deyil, əhalinin digər çağırışlardan formalaşan davranışlarıdır. Sahibkarlıq fəaaliyyəti ilə məşğul olmayan insanın kartına günə 5 mədaxil olmamalıdır. Bunun bir hissəsi vergidən yayınma, bir hissəsi mərc oyunlarıdır”.

AMB sədri vurğulayıb ki, xüsusi hallarda kartlara tətbiq olunan limit aradan qaldırıla bilər:

“Kimdəsə belə bir xüsusi hal varsa, banka müraciət edə və o limitin yığışdırılmnasına nail ola bilər. Həm 5 dəfə mədaxil, həm 20 min manat, həm də “1 məhsul 1 kart” limitlərini aradadan qaldırıla bilərlər. Bu, qadağa deyil. Qadağa odur ki, mən xüsusi vəziyyəti izah etsəm də, mənim üçün bu limitlər aradan qaldırılmır. Limitlər müəyyən olunsa da, qapılar açıq saxlanılıb. Vergidən yayınma və qeyri-qanuni fəaliyyət yoxdursa, məhdudiyyətlər aradan qalxa bilər”.

T. Kazımov limitlərdən sonra nağd dövriyyənin artacağı ilə bağlı narazılıqların yarandığını, lakin hazırda bunun müşahidə olunmadığını əlavə edib.