İxrac məhdudiyyətləri və iqlimin mənfi təsiri səbəbindən 2024-cü ildə əsas qida məhsullarının qlobal təchizatı azalacaq. Bu il Asiyanın əksər hissəsinə quraqlıq gətirən El-Ninyo hava hadisəsi düyü, buğda, palma yağı və digər məhsulların tədarükünü təhdid altına alaraq 2024-cü ilin birinci yarısına qədər davam edəcəyi proqnozlaşdırılır.

Bunu “IKON Commodities” kənd təsərrüfatı broker şirkətinin konsultasiya xidmətləri üzrə direktoru Ole Hou bildirib.

O əlavə edib ki, Çin böyük həcmdə buğda və qarğıdalı almaqla “bazarı təəccübləndirir”.

2023-cü ildə düyü qiymətləri artıq Hindistandakı quraqlıq səbəbindən 40-45 faiz artaraq son 15 ilin ən yüksək səviyyəsinə çatıb. Hindistanda gələn il də quraqlıq olacağı gözlənilir və anbar ehtiyatları son yeddi ilin ən aşağı səviyyəsinə düşdüyü üçün ilk dəfə düyü idxalına başlaya bilər.

Quraqlıq fonunda Avstraliyada məhsulun azalmasına görə, əsas alıcılar olan Çin və İndoneziya böyük həcmdə buğda üçün ixracın onsuz da məhdud olduğu Şimali Amerika, Avropa və Qara dəniz regionuna müraciət edəcək.