“İran ekoloji problemlərə çox ciddi yanaşır və hüquq sistemində ekoloji mühitin qorunmasına nəzarət məhkəmə hakimiyyətinin öhdəsindədir”.
Bunu İranın Baş prokurorunun müavini Qolam Abbas Torki Bakıda Xəzəryanı dövlətlərin Baş prokurorluqlarının rəhbər vəzifəli şəxslərinin Bakıda keçirilən “Xəzər dənizinin akvatoriyasında ekoloji hüquqpozmalar: Dəniz mühitinin qorunması üçün prokurorluq orqanlarının strategiyaları” mövzusunda beştərəfli görüşü zamanı deyib.

“Biz Xəzər dənizi hövzəsində ekoloji mühiti qorumaq üçün sahilyanı dövlətlərlə yaxın əməkdaşlıq etməyə hazırıq. İranın hüquq sistemində ekoloji mühitin qorunmasına nəzarət məhkəmə hakimiyyətinin öhdəsindədir.

Belə tədbirlər tərəfdaş ölkələrin ekologiya sahəsində qanunvericiliyi ilə tanış olmaq və təcrübə mübadiləsi aparmaq üçün mükəmməl imkandır. Xəzərdəki nərə və digər balıq növlərinin qorunması bütün sahilyanı dövlətlər üçün önəmli məsələdir”, – deyə o bildirib.

“Ümidvaram ki, bu əməkdaşlıq əlaqələrimiz Xəzəryanı ölkələrin ekologiyasının mühafizəsi və sağlam ətraf mühitin formalaşdırılması üçün faydalı olacaq” - deyən İranın Baş prokurorunun müavini qeyd edib ki, bu sahədə təcrübə mübadiləsinin aparılması da tərəflər üçün çox faydalı olar.