Mayın 10-u müstəqil Azərbaycan dövlətinin memarı və qurucusu xalqımızın dahi oğlu və ümummilli lideri Heydər Əliyevin anadan olmasının 101-ci il dönümüdür. Qədirbilən Azərbaycan xalqı, bütün dünyada Heydər Əliyevi tanıyanlar və sevənlər 21-ci ildir bu dahi şəxsiyyətin doğum gününü onsuz qeyd edirlər.
Azərbaycanın çoxəsrlik dövlətçilik tarixində ulu öndərimiz Heydər Əliyevin müstəsna yeri vardır. Ümummilli lider Heydər Əliyev Azərbaycan dövlətini və millətini zamanın ən çətin sınaqlarından çıxararaq ölkənin ictimai-siyasi, iqtisadi və mədəni-mənəvi tərəqqisinə nail olmuş qüdrətli şəxsiyyətdir. Azərbaycanın müasir tarixinin taleyüklü hadisələrlə dolu olan otuz ildən artıq bir dövrü məhz Heydər Əliyevin adı və fəaliyyəti ilə bağlıdır. Ulu öndərimizin hakimiyyətdə olduğu-istər 1969-1982-ci illər, istərsə də 1993-2003-cü illər Azərbaycanın sözün həqiqi mənasında çiçəkləndiyi, hərtərəfli inkişaf dövrü olmuşdur.
Azərbaycanın siyasi və iqtisadi müstəqilliyinin təməl daşları hələ Heydər Əliyevin respublikamıza birinci rəhbərliyi dövründə qoyulmuşdu. Müstəqillik illərində isə məhz ulu öndərimizin gərgin və titanik səyləri, düşünülmüş müdrük siyasi kursu sayəsində Azərbaycan nəinki öz suverenliyini qoruyub saxlamış, onu əbədi prosesə çevirmiş, dünyanın qüdrətli dövlətləri səviyyəsinə yüksəltmişdir. Təsadüfi deyil ki, ulu öndərimiz Heydər Əliyevin fəaliyyəti öz fəaliyyəti etibarilə Azərbaycanın hüdudlarından çox-çox kənara çıxır. Dünyada baş verən proseslərə təsiri baxımından xüsusilə seçilən və bəşəriyyətin ən aktual çağırışlarına cavab verən dahi Heydər Əliyev zəmanəmizin tanımış ictimai-siyasi xadimləri arasında müstəsna yer tutur. Ulu öndərimizin siyasi kursu daim Azərbaycana uğur gətirib və bu gün də gətirməkdədir.
Hazırda ümummilli liderimiz Heydər Əliyevin müəyyənləşdirdiyi və xalqımızı işığlı gələcəyə aparan tərəqqi və inkişaf yolu Azərbaycan Respublikasının prezidenti cənab İlham Əliyev tərəfindən müvəffəqiyyətlə davam etdirilir və bu yol gələcəkdə də Azərbaycanın sürətli sosial-iqtisadi inkişafını və xalqımızın həyat səviyyəsinin gündən-günə yüksəlməsini təmin edəcəkdir.

Fuad Səfərov,
25 saylı xüsusi
notariat kontorunun rəisi